సూపర్‌స్టార్ మహేశ్‌ బాబు 25వ చిత్రం 'మహర్షి' మరికొన్ని గంటల్లో థియేటర్లలోకి రానుంది. ఈ సినిమాపై అభిమానులు, మహేశ్, ముగ్గురు నిర్మాతలు, డైరెక్టర్ భారీగానే ఆశలు పెట్టుకున్నారు. అంతేకాదు కచ్చితంగా బ్లాక్ బస్టర్ కొడతామని.. సినిమా చూసిన తర్వాత కచ్చితంగా మహేశ్ అభిమాని కాలర్ ఎగరేసుకుని థియేటర్ నుంచి బయటికొస్తారని ధీమా వ్యక్తం చేస్తోంది చిత్రబృందం. ఇక మహర్షి సంగతి పక్కనెడితే మహేశ్ తదుపరి సినిమా (26వ చిత్రం) అనిల్ రావిపూడితో ఉంది. ఇప్పటికే కథ వినడం.. వగైరా అన్నీ అయిపోగా సెట్స్‌పైకి వెళ్లడమే తరువాయి. ఇది కూడా జూన్ నెలలో ఉండొచ్చనే తెలుస్తోంది. 

ఇదిలా ఉంటే.. మహేశ్‌తో సినిమా తీయడానికి డైరెక్టర్లు క్యూ కడుతున్నారు. ఇప్పటికే సుకుమార్, పూరీ జగన్నాథ్, రాజమౌళి, త్రివిక్రమ్‌ రెడీగా ఉన్నారని వార్తలు వచ్చిన సంగతి తెలిసిందే. వీరితో సినిమాలు తప్పకుండా ఉంటాయని కూడా మహేశ్ పరోక్షంగా చెప్పుకొచ్చారు. అయితే అదేం లేదని మహేశ్‌తో 27వ సినిమా తానే తీస్తున్నానని ‘గీత గోవిందం’ డైరెక్టర్ పరుశురామ్‌ చెప్పుకుంటున్నారట. 'గీత గోవిందం' మూవీతో మంచి ఊపు మీదున్న పరుశారామ్.. ఇదే ఊపులో సినిమా తీసేస్తే కచ్చితంగా బ్లాక్ బస్టరే అని యోచిస్తున్నారట. ఇప్పటికే కథ వినిపించం, మహేశ్ గ్రీన్ సిగ్నల్ ఇచ్చారనటి టాక్ నడుస్తోంది.

ఇటీవలే.. మహేశ్ బాబును కలిసిన పరుశారామ్ కథ మొత్తం చెప్పగా శభాష్ అని మెచ్చుకున్న సూపర్‌స్టార్.. అక్కడక్కడ కొన్ని మార్పులు చేర్పులు చేయాలని సలహాలు, సూచనలు చేశారట. అంతేకాదు పూర్తి స్క్రిప్ట్‌ రెడీ చేసుకోవాలని 27వ సినిమా మీతోనేనని పరుశురామ్‌కు మహేశ్ గ్రీన్ సిగ్నల్ ఇచ్చేశారట. కథ చాలా ఇంట్రెస్టింగ్‌గా.. డిఫరెంట్‌గాను ఉండటంతో మహేశ్ మారుమాట చెప్పకుండా గ్రీన్ సిగ్నల్ ఇచ్చేసుంటారని ఫిల్మ్‌నగర్‌లో పుకార్లు వస్తున్నాయి. కాగా ఈ సినిమా గీతా ఆర్ట్స్ బ్యానర్‌లో ఉంటుందని వార్తలు వినవస్తున్నాయి. మహేశ్ గ్రీన్‌ సిగ్నల్ ఇవ్వడంతో పరుశురామ్ ఆనందానికి అవధుల్లేకుండా పోయాయట.

కాగా.. 'గీత గోవిందం' సినిమా పేరు చెప్పగానే.. అందమైన ఈ ప్రేమకథాంశం, మంచి హార్ట్ టచింగ్ సాంగ్స్ గుర్తొస్తాయ్.. యూత్‌ను ఈ సినిమా ఎంతగానో ఆకట్టుకున్న సంగతి తెలిసిందే. అయితే మహేశ్‌తో తీయబోయే సినిమా ఎలా ఉంటుందో.. అసలు సినిమా ఉంటుందో ఉండదో అనేది అటు మహేశ్ నుంచి గానీ.. ఇటు పరుశురామ్ నుంచి రియాక్షన్ రావాల్సి ఉంది.