సూపర్ స్టార్ మహేష్ బాబు 25వ చిత్రం వంశీ పైడిపల్లి దర్శకత్వంలో రూపొందుతున్న విషయం తెలిసిందే. పూర్తిగా అమెరికాలోనే చిత్రీకరణ జరుపుకోబోయే ఈ చిత్రం కోసం...ఇప్పటికే న్యూయార్క్ పరిసర ప్రాంతాల్లో కొన్ని లొకేషన్లను కూడా ఎంపిక చేసారు దర్శకుడు. ఇందులో మహేష్ బాబు సరసన డీజే భామ పూజా హెగ్డే కథానాయికగా నటించనుంది.

టాలీవుడ్ రాక్ స్టార్ దేవిశ్రీ ప్రసాద్ ఈ సినిమాకు సంగీతాన్ని అందిస్తున్నారు. ఇప్పటికే రెండు పాటలకి సంబంధించి బాణీలను కూడా దర్శకుడు వంశీకి వినిపించినట్టు సమాచారం. ప్ర‌ముఖ నిర్మాత‌లు అశ్వినీదత్, దిల్ రాజు సంయుక్తంగా నిర్మిస్తున్న ఈ సినిమాని...మే ఆఖరి వారం నుంచి చిత్రీకరణ ప్రారంభించి 2019 సంక్రాంతికి విడుదల చేయాలని ప్లాన్ చేస్తున్నారు. మహేష్ బాబు తనకున్న కమిట్‌మెంట్స్ అన్నీ పూర్తి చేసుకుని.. మే నెల కల్లా చిత్రీకరణలో పాల్గొంటారని సన్నిహిత వర్గాలు వెల్లడిస్తున్నాయి. ఇదిలా వుంటే.. ప్రస్తుతం మహేష్ బాబు, కొరటాల శివ కలయికలో తెరకెక్కుతున్న భరత్ అనే నేను` సినిమా చిత్రీకరణ చివరి దశలో ఉంది. ఈ చిత్రం వేసవి సందర్భంగా ఏప్రిల్ 27న విడుదల కానున్న సంగతి తెలిసిందే.