తెలుగువారి ఆరాధ్యనటి సావిత్రి జీవిత కథ ఆధారంగా తెరకెక్కుతున్న చిత్రం 'మహానటి'. నాగ ఆశ్విన్ దర్శకత్వం వహిస్తున్నారు.  వైజయంతీ మూవీస్ పతాకంపై సి. అశ్వినీదత్ ఎంతో ప్ర‌తిష్ఠాత్మ‌కంగా ఈ చిత్రాన్ని నిర్మిస్తున్నారు.

సావిత్రిగా కీర్తి సురేష్ నటిస్తున్న ఈ చిత్రంలో దుల్కర్ సల్మాన్, విజయ్ దేవరకొండ, సమంత, మోహన్ బాబు, భానుప్రియ, క్రిష్, ప్రకాష్ రాజ్ ముఖ్యపాత్రలు పోషిస్తున్నారు. ఈ చిత్రాన్ని వేసవి కానుకగా మే 9న విడుదల చేయనున్నారు.

ఇదిలా ఉంటే.. గతంలో వైజయంతి మూవీస్ పతాకంపై అశ్వినీదత్ నిర్మించిన "జగదేకవీరుడు అతిలోకసుందరి" ఇదే తేదీకి అంటే.. మే 9, 1990న విడుదలైంది. మెగాస్టార్ చిరంజీవి, అతిలోకసుందరి శ్రీదేవి జంటగా కె.రాఘవేంద్ర రావు దర్శకత్వం వహించిన ఈ చిత్రం అప్ప‌ట్లో భారీ విజయాన్ని నమోదు చేసింది.

తిరిగి 18 సంవత్సరాల గ్యాప్ తర్వాత ఇదే తేదీకి అంటే.. మే 9, 2008కి ఎన్టీఆర్, హన్సిక జంటగా మెహర్ రమేష్ డైరెక్షన్‌లో 'కంత్రి' సినిమాని విడుదల చేశారు ఆ చిత్ర నిర్మాత సి.అశ్వినీదత్. ఈ సినిమా ఆశించినంత విజయాన్ని అందించలేకపోయింది.

ఇప్పుడు ఇదే తేదీకి 'మహానటి' విడుదల కాబోతుండడం సినీ ప్రేక్షకులలో ఆసక్తి నెలకొంది. ఈ తేదీకి ఒక ఘన విజయాన్ని, ఒక పరాజయాన్ని చవిచూసిన ఈ సంస్థ‌.. మూడోసారి ఎలాంటి ఫ‌లితాన్ని అందుకుంటుదో చూడాలి.