5 பைசாவுக்கு 1 கிலோ சிக்கன்… உசிலம்பட்டியில் அலைமோதிய கூட்டம்!!!
- IndiaGlitz, [Monday,November 30 2020]
கார்த்திகை நாளான நேற்று ஒரு சிக்கன் இறைச்சி விற்பனை நிறுவனம் தனது கிளையை உசிலம்பட்டியில் துவங்கி இருக்கிறது. தன்னுடைய கிளை நிறுவனத்தை பிரபலப்படுத்த வேண்டும் என நினைத்த அந்த நிறுவன அதிகாரிகள் ஒரு வித்தியாசமான ஆஃபர் அறிவிப்பை வெளியிட்டு உள்ளனர். அதாவது 5 காசு நாணயத்தை கொண்டு வந்தால் ஒரு கிலோ சிக்கன் வழங்கப்படும் என அறிவிக்கப்பட்டது.
50 காசு நாணயமே செல்லாது என நினைத்து பலரும் தூக்கி எறிந்து கொண்டிருக்கும் இந்தக் காலக்கட்டத்தில் யார் 5 பைசா நாணயத்தை வைத்திருக்கப் போகிறார்கள் என நினைத்து அந்த நிறுவனம் இந்த அறிவிப்பை வெளியிட்டதாகக் கூறப்படுகிறது. ஆனால் 5 பைசா நாணயத்தை வைத்துக் கொண்டு நேற்று உசிலம்பட்டி பகுதியில் நூற்றுக் கணக்கான மக்கள் சிக்கன் வாங்குவதற்காக குவிந்து உள்ளனர்.
இந்தக் காட்சியைப் பார்த்த அந்நிறுவன அதிகாரிகளே மலைத்து போயுள்ளனர். இந்நிலையில் 5 பைசா நாணயத்தைக் கொடுத்து சிக்கன் வாங்கிச் சென்ற பல வாடிக்கையாளர்கள் மகிழ்ச்சியில் துள்ளிக் குதித்தாகக் கூறப்படுகிறது. இதனால் உசிலம்பட்டி பேரையூர் சாலையில் கூட்ட நெரிசல் அதிகமாக இருந்ததாகவும் அதை போலீசார் சரிப்படுத்தியதாகவும் கூறப்படுகிறது.