பிரமாண்ட இயக்குனர் எஸ்.எஸ்.ராஜமெளலி இயக்கிய 'பாகுபலி' மற்றும் 'பாகுபலி 2' ஆகிய இரண்டு படங்களிலும் தமிழ் பதிப்பின் வசனங்களை எழுதியவர் மதன்கார்க்கி என்பது தெரிந்ததே. இவருடைய உணர்ச்சிமயமான வசனங்கள் படத்தின் வெற்றிக்கு ஒரு காரணமாக இருந்தது.

இந்த நிலையில் இயக்குனர் எஸ்.எஸ்.ராஜமெளலி இயக்கத்தில் ராம்சரண் தேஜா, ஜுனியர் என்.டி.ஆர் நடிக்கவுள்ள அடுத்த படத்தின் தமிழ் பதிப்பிற்கும் மதன்கார்க்கி வசனம் எழுதவுள்ளார்.

தமிழ், தெலுங்கு ஆகிய இரு மொழிகளில் தயாராகவுள்ள இந்த படத்தின் படப்பிடிப்பு வரும் 19ஆம் தேதி முதல் தொடங்கவுள்ளது. விஜயேந்திர பிரசாத் திரைக்கதையில் ஸ்ரீகர் பிரசாத் படத்தொகுப்பில் எம்.எம்.கீரவானி இசையில், சாபுசிரில் கலை இயக்கத்தில் உருவாகவுள்ள இந்த படத்தின் தொடக்கவிழா நேற்று நடைபெற்றது. இந்த விழாவில் சிரஞ்சீவி, பிரபாஸ், ராணா உள்ளிட்டோர் கலந்து கொண்டனர்.