చిన్నప్పుడే తల్లి చనిపోయిన కొడుకుని.. పెంచి పెద్ద చేయడం కోసం సర్వస్వం త్యాగం చేసిన ఓ తండ్రికి.. మళ్ళీ పెళ్లి చేయాలనుకునే కొడుకు కథే 'మా నాన్నకు పెళ్లి'. 1984లో సుహాసిని హీరోయిన్ గా వచ్చిన 'స్వాతి' సినిమాకు రివర్స్ ట్రీట్మెంట్ సినిమాయే ఈ చిత్రం. ఆ సినిమాలో క‌థానాయిక త‌న త‌ల్లి శార‌ద‌కి మ‌ళ్ళీ పెళ్లి చేస్తే.. మా నాన్న‌కి పెళ్ళిలో క‌థానాయ‌కుడు త‌న తండ్రికి మ‌ళ్ళీ పెళ్ళి చేస్తాడు.

ద‌ర్శ‌కుడు ఇ.వి.వి.సత్యనారాయణ.. తను రాసుకున్న ఈ కథని చాలా చక్కగా, కుటుంబ స‌మేతంగా చూడ‌ద‌గ్గ విధంగా మలుచుకున్నారు. రోజా మూవీస్ ప‌తాకంపై సీనియ‌ర్ నిర్మాత అర్జున రాజు ఈ చిత్రాన్ని నిర్మించారు. తండ్రి పాత్రలో రెబెల్ స్టార్ కృష్ణంరాజు నటించగా.. కొడుకుగా శ్రీకాంత్, కృష్ణంరాజు తండ్రిగా కోట శ్రీనివాసరావులు నటించారు.

శ్రీ‌కాంత్ కి జోడీగా సిమ్రాన్‌, కృష్ణంరాజుకి జోడీగా అంబిక న‌టించారు. రామోజీ ఫిలిం సిటీలో షూటింగ్ జరుపుకున్న మొదటి చిత్రం ఇదే కావడం విశేషం. ఈ సినిమాకి రెండు నంది అవార్డులు వచ్చాయి. ఒకటి ఉత్త‌మ హాస్య‌న‌టుడుగా ఎం.ఎస్.నారాయణకి ద‌క్కితే.. రెండోది ఉత్త‌మ‌ కుటుంబ కథా చిత్రంగా నిర్మాత అర్జున్ రాజు అందుకున్నారు.

వేటూరి, సిరివెన్నెల, షణ్ముఖ శర్మ, చంద్రబోసు ఈ సినిమాకి పాటలు రాసారు. ముఖ్యంగా "ఓ జాబిలమ్మ ఎందుకు ఎందుకు అందవమ్మ" పాట అప్పట్లో మంచి జనాదరణ పొందింది. కోటి స్వరపరచిన ఆరు పాటలు సినిమాకి అదనపు బలమనే చెప్పాలి. అలాగే ఎం.ఎస్.నారాయణతో చేయించిన ఇ.వి.వి. మార్కు తాగుబోతు కామెడీ పాత్ర‌ సినిమాకి ప్లస్.

ఈ సినిమా తర్వాత ప్రతి డైరెక్టర్ కూడా ఎం.ఎస్.తో అటువంటి కామెడీనే కోరుకున్నారంటే.. ఈ సినిమాలో కామెడీకి ఇ.వి.వి. ఏవిధంగా తనదైన ముద్ర వేసారో అర్ధం చేసుకోవచ్చు. డిసెంబర్ 5, 1997న రిలీజైన మా నాన్న‌కి పెళ్ళి.. నేటితో 20 వ‌సంతాల‌ను పూర్తిచేసుకుంటోంది.