సార్వత్రిక ఎన్నికల ముందు టాలీవుడ్‌లో జరుగుతున్న మూవీ ఆర్టిస్ట్ అసోసియేషన్ పోలింగ్ ‘మినీ ఎలక్షన్‌’ను తలపిస్తున్నాయి. ‘మా’‌ ఏర్పాటు చేసినప్పట్నుంచి ఈ రేంజ్‌లో అధ్యక్ష పదవి కోసం పోటీపడుతుండటం ఇదే తొలిసారి. ఆ మా పీఠంలో ఏముందో ఏమోగానీ.. మళ్లీ అధ్యక్ష పదవి దక్కించుకోవాలని శివాజీ రాజా రెండోసారి పోటీ పడుతుండటం.. తనను గెలిపిస్తే ఇచ్చిన హామీలన్నీ నెరవేరుస్తానని ఆశీర్వదించండి అని నరేశ్.. ఇలా నువ్వా.. నేనా అనే రేంజ్‌‌లో తలపడుతున్నారు. ఓటేయడానికి సభ్యులుగా భారీగా తరలివస్తుండటంతో పోలింగ్ ప్రక్రియ మరోగంట పెంచుతున్నట్లు అధికారులు తెలిపారు. మధ్యాహ్నం 3గంటల వరకు పోలింగ్ జరగనుంది.

ఇప్పటి వరకూ ..జరిగిన ‘మా’ ఎన్నికల్లో 300 ఓట్లు పోలవ్వడం అంటే మహా గండం.!. అంతకుమించి ఓట్లు పోలయినట్లు ‘మా’ హిస్టరీలో లేదు. అయితే తాజాగా నరేశ్-శివాజీ రాజా పోటీపడుతున్న నేపథ్యంలో.. మధ్యాహ్నం 1గంటవరకు సుమారు 315కు పైగా ఓట్లు నమోదవ్వడం విశేషమని చెప్పుకోవచ్చు. ఇంకా గంట అనగా.. మధ్యాహ్నం 3గంటల వరకు సమయం ఉండటంతో ఇంకో వంద ఓట్లు పోలవ్వచ్చని తెలుస్తోంది. మా ఎన్నికల్లో ఈ రేంజ్‌లో ఓట్లు పోలవ్వడం ఇదే ఫస్ట్ టైమ్ కావడంతో అటు శివాజీ రాజా.. ఇటు నరేశ్ ఆనందం వ్యక్తం చేస్తున్నారు.

ఫుల్ జోష్‌‌లో నరేశ్, శివాజీ రాజా..!

ఓట్ల సంఖ్య పెరగడంతో మరోసారి గెలుస్తానని శివాజీ రాజా ఫుల్ ఆనందంలో మునిగితేలుతున్నారు. మరోవైపు మెజార్టీ పెరుగుతుందని నరేశ్ సంతోషం వ్యక్తం చేస్తున్నారు. సో.. ఇద్దరిలో అధ్యక్ష పీఠం ఎవరిది అనే విషయం సాయంత్రం 8 గంటల కల్లా తేలిపోనుంది.