காதலியை பயமுறுத்த விளையாட்டாக தூக்கு மாட்டிய இளைஞர் பரிதாப மரணம்
- IndiaGlitz, [Friday,January 06 2017]
மும்பையை சேர்ந்த ஒரு இளைஞர் தன்னுடைய காதலி தன்னைவிட்டு எப்போதும் பிரிந்துவிட கூடாது என்று பயமுறுத்துவதற்காக விளையாட்டாக தூக்கு மாட்ட முயன்றபோது விளையாட்டு வினையாகி பரிதாபமாக பலியானார்.
மும்பையை சேர்ந்த சன்மித் ரானே என்ற 21 வயது கல்லூரி மாணவர் கடந்த சில மாதங்களாக ஒரு பெண்ணை காதலித்து வந்தார். இவர் சமீபத்தில் காதலியை சந்தித்து தன்னைவிட்டு எப்போதும் பிரிந்துவிட நினைக்க கூடாது என்றும் அப்படி பிரிய நினைத்தால் தூக்கு மாட்டி உயிரை மாய்த்து கொள்வதாகவும் கூறியுள்ளார்.
வெறும் வார்த்தைகளால் கூறியது மட்டுமின்றி காதலியின் துப்பட்டாவை வாங்கி விளையாட்டுக்காக கழுத்தில் தூக்கு கயிறு போல மாட்டி பயமுறுத்தியுள்ளார்.
அந்த சமயத்தில் அவர் நின்றிருந்த நாற்காலி திடீரென தடுமாறியதால் அவரது கழுத்தை துப்பட்டா இறுக்கியது. இதை பார்த்து அதிர்ச்சி அடைந்த அவருடைய காதலி செய்வதறியாது திகைத்து உடனடியாக சன்மித் பெற்றோருக்கு தகவல் கொடுத்துள்ளார்.
விரைந்து வந்த பெற்றோர், சன்மித்தை மருத்துவமனைக்கு அழைத்து சென்றனர். ஆனால் அதற்குள் சன்மித் இறந்துவிட்டதாக மருத்துவர்கள் தெரிவித்தனர். இதுகுறித்து மும்பை போலீசார் வழக்கு பதிவு செய்து விசாரணை செய்து வருகின்றனர்.