సినిమా షూటింగ్‌లో ఏర్పడిన పరిచయం ఇద్దరి మధ్య ప్రేమకు దారితీసింది. ఆరునెలలపాటు చెట్టాపట్టాలేసుకుని ఆ ప్రేమబంధం చివరకు ఆ యువతి ప్రాణాలను బలిగొనేలా చేసింది. ఈ దారుణ ఘటన పశ్చిమ గోదావరి జిల్లా యలమంచిలి మండలం కాజలో చోటు చేసుకుంది.

అసలేం జరిగింది..!

వివరాల్లోకెళితే.. ఆదివారం జరిగిన యువతి మహిత హత్య కేసులో కొత్త కోణాలు వెలుగు చూస్తున్నాయి. హత్య జరిగిన అనంతరం పలు కోణాల్లో దర్యాప్తు చేసిన పోలీసులు అసలు విషయమేంటో చేధించారు. భీమవరం మండలం కరకువాడ బేతపూడికి చెందిన మహిత ఇంటర్ ద్వితీయ సంవత్సరం చదువుతోంది. ఆమె తల్లి గల్ఫ్‌లో ఉండగా, తండ్రి డ్రైవర్‌గా స్థానికంగా పనిచేస్తున్నాడు. మహిత ఇంటర్‌ను రాజోలులో చదువుతోంది. కాగా కొన్ని నెలల క్రితం రాజోలు, పాలకొల్లు పరిసర ప్రాంతాల్లో ఒక సినిమా షూటింగ్ జరిగింది. ఆ షూటింగ్ చూడడానికి తన స్నేహితులతో వెళ్ళిన మహితకు అక్కడ మహేష్ పరిచయమయ్యాడు. ఒక ప్రొడక్షన్ మేనేజర్ వద్ద డ్రైవర్‌గా పని చేస్తున్న మహేష్‌కు మహితకు మధ్య ఏర్పడిన పరిచయం ప్రేమగా మారింది. కాగా.. కృష్ణాజిల్లా మైలవరం చెందిన మహేష్‌కు ఇది వరకే వివాహమైంది. అయితే భార్య భర్తల మధ్య వివాదాలు తలెత్తడంతో మహేష్‌పై కేసు కూడా నమోదైంది. ఇదే విషయాన్ని మహితకు మహేష్ చెప్పాడు.. ఇష్టం అయితే వివాహం చేసుకుంటానని చెప్పాడు. ఆ విషయం తన తల్లిదండ్రులతో మాట్లాడాలని మహేష్‌కు మహిత సూచించింది.

ఒప్పుకోలేదని కాటికి పంపాడు!

ఇద్దరిదీ ఒకే సామాజిక వర్గం అయినప్పటికీ మహేష్‌కి గతంలో వివాహం కావటంతో వారి పెళ్లికి మహిత పెద్దలు అంగీకరించలేదు. ఈ ప్రేమ వ్యవహారం తెలుసుకున్న కుటుంబ సభ్యులు కూడా మహితను కట్టడి చేశారు. ఆమెను యలమంచిలి మండలం కాజాలోని బంధువుల ఇంట్లో ఉంచారు. ఈ క్రమంలో ఆదివారం మహేష్ మైలవరం నుంచి ముగ్గురు మిత్రులతో కలిసి బైక్‌పై అక్కడకు వచ్చాడు. మహిత స్నేహితురాలి ద్వారా ఆమెను ఊరి చివరకు రప్పించాడు. తనను పెళ్లి చేసుకోవాలని ఆమెపై ఒత్తిడి తెచ్చాడు. అయితే.. మహిత అందుకు నిరాకరించడంతో వారి మధ్య వాగ్వాదం జరిగింది. దీంతో తీవ్ర ఆగ్రహానికి లోనైన మహేష్ తన వెంట తెచ్చుకున్న కత్తితో మహితను నరికి హత్య చేసాడు. ఈ సంఘటన చూస్తున్న వెంట వచ్చిన ఇద్దరు మిత్రులు బైక్‌పై పరారయ్యారు. అక్కడే ఉన్న మహిత స్నేహితురాలు కేకలు వేయడంతో.. అక్కడికి చేరుకున్న గ్రామస్తులు మహేష్‌పై దాడి చేసారు. దాంతో అతను స్పృహ కోల్పోయాడు. అక్కడకి చేరుకున్న పోలీసులు మహేష్‌ను పాలకొల్లు ఆసుపత్రికి తరలించారు. ఈ హత్యలో మహేష్ ఇద్దరి మిత్రుల ప్రమేయం పైనా పోలీసులు ఆరాతీస్తున్నారు. ప్రస్తుతం మహేష్‌ను పోలీసులు విచారిస్తున్నారు.