వెంకన్న సాక్షిగా సీమను ఎవరూ చేయనంత అభివృద్ధి చేస్తా...
- IndiaGlitz, [Sunday,March 03 2019]
రాయ‌ల‌సీమ ప్రాంతానికి ఇంత మంది ముఖ్యమంత్రులు వ‌చ్చారు.. జనసేనను గెలిపిస్తే మ‌రే ముఖ్యమంత్రీ చేయ‌ని స్థాయిలో సీమ‌ని అభివృద్ది చేస్తాను అని ఏడుకొండ‌లవాడి సాక్షిగా జనసేన అధినేత పవన్ కల్యాణ్ చెప్పుకొచ్చారు. ప్రజా పోరాట యాత్రలో భాగంగా చిత్తూరు జిల్లాలో పవన్ రెండో రోజు పర్యటించారు. ఈ సందర్భంగా జిల్లాలోని పలుచోట్ల రోడ్ షోల‌ు నిర్వహించగా.. కి క‌నీవినీ ఎరుగ‌ని రీతిలో స్పంద‌న వచ్చింది. మద‌న‌ప‌ల్లి, పుంగ‌నూరు, ప‌ల‌మ‌నేరుల్లో లక్షల మంది పవన్‌కు అపూర్వ స్వాగతం పలికారు. దారి పొడవునా జనసేనానిపై పూల వర్షం కురిసింది. వంద‌లాది బైక్‌లు, కార్లతో కార్యకర్తలు, అభిమానులు భారీ ర్యాలీ నిర్వహించారు. జన‌సేనాని రోడ్ షో పుంగ‌నూరు దాట‌డానికి సుమారు గంట‌కు పైగా స‌మ‌యం పట్టింది. సీఎం.. సీఎం.. అంటూ కార్యకర్తలు నినాదాల‌తో హోరెత్తించారు.
మాటిస్తున్నా...
ఈ సందర్భంగా పవన్ మాట్లాడుతూ.. హార‌తులు, వీర‌తిల‌కాల‌తో ఇంత‌టి ఘ‌న‌స్వాగ‌తం ప‌లికిన ఆడ‌ప‌డుచుల‌కి, జనసేన శ్రేణుల‌కి పేరుపేరునా ధ‌న్యవాదాలు. ఇంత‌టి ప్రేమ చూపిన మీకు రుణప‌డి ఉంటాను. ఇంత మంది ప్రజ‌లు రోడ్ల మీదికి వ‌చ్చి త‌మ ఆవేద‌న‌ని అరుపుల రూపంలో తెలుపుతున్నారంటే, మార్పుకి ఇంత‌కు మించిన సంకేతం ఏం కావాలి. ప్రజ‌లు బ‌ల‌మైన మార్పు కోరుకుంటున్నార‌న‌డానికి ఇదే నిద‌ర్శనం. ఏడుకొండ‌లవాడి సాక్షిగా, పీర్ బాబా సాక్షిగా చెబుతున్నా రాయ‌ల‌సీమ‌ను ఏ ముఖ్యమంత్రి చేయ‌ని విధంగా అభివృద్ది ప‌రిచి చూపిస్తా. మోసం చేసే మ్యానిఫెస్టో ఇవ్వను.. అమలు చేయగలిగే మ్యానిఫెస్టోను తీసుకొస్తాను. రాయ‌ల‌సీమ ప్రాంతానికి ఇంత మంది ముఖ్యమంత్రులు వ‌చ్చారు.. జనసేనను గెలిపిస్తే మ‌రే ముఖ్యమంత్రీ చేయ‌ని స్థాయిలో సీమ‌ని అభివృద్ది చేస్తానని మీకు మాటిస్తున్నాను. యువ‌త‌కి ఉపాధి, ఉద్యోగ అవ‌కాశాలు క‌ల్పిస్తాం. నేను మీ వాడిని, మీకు అండ‌గా ఉండ‌డానికే వ‌చ్చాన‌ు అని పవన్ భరోసా కల్పించారు.
కాగా.. సీఎం చంద్రబాబు సొంత జిల్లాలో ఈ రేంజ్‌‌లో పవన్ కల్యాణ్ ఘన స్వాగతం లభించడంతో జనసేన కార్యకర్తలు ఉప్పొంగిపోతున్నారు. ఇదంతా మార్పు సూచకమేనని.. కచ్చితంగా ఈ ఎన్నికల్లో జనసేన సత్తా ఏంటో తెలుస్తుందని జనసైనికులు చెబుతున్నారు.