மூன்றே நாளில் லாபத்தை பெற்ற 'எல்.கே.ஜி'
- IndiaGlitz, [Monday,February 25 2019]
ஆர்.ஜே.பாலாஜி, ப்ரியா ஆனந்த் நடிப்பில் உருவான 'எல்.கே.ஜி' திரைப்படம் கடந்த வெள்ளியன்று வெளியாகி மூன்றே நாட்களில் இந்த படத்தின் பட்ஜெட் தொகையை எடுத்துவிட்டதாகவும், இன்று முதல் லாபத்தை நோக்கி சென்று கொண்டிருப்பதாகவும் இந்த படத்தின் தமிழக உரிமையை வாங்கி வெளியிட்ட சக்திவேலன் தரப்பினர் தெரிவித்துள்ளனர். மேலும் இந்த படம் குறைந்த பட்ஜெட் படம் என்பதால் நல்ல லாபத்தை தரும் என எதிர்பார்க்கப்படுகிறது.
'எல்.கே.ஜி' திரைப்படம் கடந்த மூன்று நாட்களில் சென்னையில் மட்டும் ரூ.1.36 கோடியும், தமிழகம் முழுவதும் சுமார் 8.5 கோடியும் வசூல் செய்துள்ளது. கடந்த சில மாதங்களாக வெளியான பல திரைப்படங்கள் போட்ட முதலீடை எடுக்கவே திணறிக்கொண்டிருந்த நிலையில் இந்த படம் மூன்றே நாளில் லாபத்தை நோக்கி சென்றுள்ளது அனைவரையும் ஆச்சரியத்தில் ஆழ்த்தியுள்ளது.
இதில் இருந்து ஒரு படம் வெற்றி அடைய ஸ்டார் வேல்யூ அல்லது பெரிய பட்ஜெட் தேவையில்லை என்பதும் கதை, உருவாகும் விதம் நன்றாக இருந்தால் சிறு பட்ஜெட் படமும் நல்ல லாபத்தை கொடுக்கும் என்பதும் மீண்டும் ஒருமுறை உறுதியாகியுள்ளது.