నితిన్ చిత్రంలో లిజీ పాత్ర ఎలా ఉంటుందంటే..
- IndiaGlitz, [Wednesday,March 21 2018]
నితిన్, మేఘా ఆకాష్ జంటగా కృష్ణ చైతన్య దర్శకత్వం వహించిన సినిమా 'ఛల్ మోహన్ రంగ'. పవన్ కళ్యాణ్, సుధాకర్ రెడ్డి నిర్మాతలు. త్రివిక్రమ్ శ్రీనివాస్ కథా ర‌చయిత కాగా.. తమన్ సంగీతాన్ని సమకూర్చారు. గ్రామీణ నేపథ్యంలో సాగే అందమైన ప్రేమ‌క‌థా చిత్రంగా ఈ సినిమా రూపొందింద‌ని సమాచారం.
ఇదిలా ఉంటే.. ఉగాది సందర్భంగా ఈ సినిమా ఆడియో జ్యూక్ బాక్స్‌ను విడుదల చేసింది చిత్ర బృందం. ఈ ఆల్బంలో వచ్చే వారం పాటని వింటే.. ఈ సినిమాలో హీరోయిన్ మేఘా ఆకాష్ పాత్ర‌కి.. అలాగే ఆమె తల్లి పాత్ర‌కి పొగరుంటుంద‌నే సెన్స్ ఉంటుంది.
ఆ తల్లి పాత్రలో ఒకప్పటి క‌థానాయిక లిజి కనిపించనున్నార‌ని సమాచారం. గతంలో త్రివిక్రమ్, నితిన్ కలయికలో వచ్చిన ‘అఆ’ కూడా గ్రామీణ నేపథ్యంలో సాగే అందమైన ప్రేమకథే కావడం విశేషం. ఆ చిత్రంలో కూడా పొగరుబోతు అత్త (నదియా) పాత్ర తెరపై సందడి చేసింది.
ఆ సినిమా మంచి విజయం సాధించిన విషయం తెలిసిందే. ఈ నేపథ్యంలో.. త్రివిక్రమ్ క‌థ‌తోనే వ‌స్తున్న ఈ సినిమా కూడా మంచి విజయం సాధిస్తుందేమో చూడాలి. ప్రస్తుతం నిర్మాణానంతర పనుల్లో ఉన్న ఈ చిత్రం ఏప్రిల్ 5న ప్రేక్షకుల ముందుకు రానుంది.