మ‌రో తెలుగు సినిమాలో లిజి
- IndiaGlitz, [Saturday,March 24 2018]
మొన్న నదియా, నిన్న ఖుష్బూ, నేడు లిజి.. ఇలా వరుసగా ఒకప్పటి కథానాయికలు ఇప్పుడు కీలక పాత్రలతో తెలుగు తెరపై సందడి చేస్తూ.. ప్రేక్షకులకు మ‌ళ్ళీ దగ్గరవుతున్నారు. 27 సంవత్సరాల విరామం అనంతరం సీనియ‌ర్ క‌థానాయిక లిజి.. నితిన్, మేఘా ఆకాష్ జంటగా రూపొందిన ‘ఛ‌ల్ మోహన్ రంగ’ చిత్రంలో నటించిన సంగతి తెలిసిందే.
కృష్ణ చైతన్య తెరకెక్కించిన ఈ చిత్రంలో.. మేఘా ఆకాష్‌కు తల్లిగా ఓ కీలక పాత్ర పోషించారామె. అంతేగాకుండా.. హిందీలో ఘన విజయం సాధించిన ‘2 స్టేట్స్’ కు రీమేక్‌గా తెరకెక్కబోతున్న సినిమాలో కూడా ఓ కీలక పాత్రలో లిజి కనిపించనున్నట్టు సమాచారం. ఈ చిత్రం ద్వారా వెంకట్ రెడ్డి దర్శకుడిగా పరిచయం కానుండగా.. అడివి శేష్, శివాని రాజశేఖర్ హీరో హీరోయిన్లుగా నటిస్తున్నారు. ఇదిలా ఉంటే.. లిజి కుమార్తె క‌ల్యాణి ప్రియదర్శిని కూడా అఖిల్ నటించిన ‘హలో’ చిత్రంతో కథానాయికగా పరిచయమైన సంగతి తెలిసిందే. ప్రస్తుతం శర్వానంద్, సుధీర్ వర్మ కలయికలో రూపుదిద్దుకోబోతున్న చిత్రంలో నటిస్తున్నారు క‌ల్యాణి.