പ്രധാനമന്ത്രി നരേന്ദ്രമോദിയുമായി കൂടിക്കാഴ്ച നടത്താനായതിൻ്റെ സന്തോഷം നടൻ ഉണ്ണി മുകുന്ദൻ പങ്കുവെച്ചു. പ്രധാനമന്ത്രിയുടെ കേരള സന്ദർശനത്തിൻ്റെ ഭാഗമായി കൊച്ചിയിൽ സംഘടിപ്പിച്ച യുവം 2023 പരിപാടിയിൽ ഉണ്ണി മുകുന്ദനും പങ്കെടുത്തിരുന്നു. താരത്തിന് പ്രധാനമന്ത്രിയെ വ്യക്തിപരമായി കാണുന്നതിനുള്ള അവസരം ലഭിക്കുകയും പ്രധാനമന്ത്രിയുമായി 45 മിനിറ്റ് സംസാരിക്കുകയും ചെയ്തു. ഗുജറാത്തിയിലാണ് ആശയവിനിമയം നടത്തിയതെന്നും ഉണ്ണിമുകുന്ദൻ സമൂഹമാദ്ധ്യമത്തിൽ പങ്കുവെച്ചു.

"ഈ അക്കൗണ്ടില്‍ നിന്നുള്ള ഏറ്റവും രോമാഞ്ചദായകമായ പോസ്റ്റ് ആയിരിക്കുമിത്. നന്ദി സര്‍. താങ്കളെ ദൂരെ നിന്ന് കണ്ട 14 വയസുകാരനില്‍ നിന്ന് ഇന്ന് നേരില്‍ കണ്ടുമുട്ടാന്‍ ഇടയായിരിക്കുന്നു. ആ നിമിഷങ്ങളില്‍ നിന്ന് ഞാന്‍ ഇനിയും മുക്തനായിട്ടില്ല. വേദിയില്‍ നിന്നുള്ള അങ്ങയുടെ കെം ഛോ ഭൈലാ (എങ്ങനെയുണ്ട് സഹോദരാ) എന്ന ചോദ്യം എന്നെ ശരിക്കും ഞെട്ടിച്ച് കളഞ്ഞു. താങ്കളെ നേരില്‍ കണ്ട് ഗുജറാത്തിയില്‍ സംസാരിക്കുക എന്നത് എൻ്റെ വലിയ സ്വപ്നമായിരുന്നു. അത് ഇപ്പോള്‍ സാധിച്ചിരിക്കുന്നു. അങ്ങ് നല്‍കിയ 45 മിനിറ്റ്, എൻ്റെ ജീവിതത്തിലെ ഏറ്റവും മികച്ച 45 മിനിറ്റ് ആയിരിക്കും. അങ്ങ് പറഞ്ഞ ഒരു വാക്ക് പോലും ഒരിക്കലും ഞാന്‍ മറക്കില്ല. ഓരോ ഉപദേശവും പ്രവര്‍ത്തിയിലേക്ക് കൊണ്ടുവന്ന് നടപ്പിലാക്കും" എന്നായിരുന്നു ഉണ്ണി മുകുന്ദൻ ഫേസ്ബുക്കിലൂടെ പറഞ്ഞ വാക്കുകള്‍.