அஜீத் நடித்து வரும் 'வேதாளம்' படத்தின் படப்பிடிப்பு இறுதிக்கட்டத்தில் இருக்கும் நிலையில் இந்த படத்தின் வியாபாரம் பெரும்பகுதி முடிந்துவிட்டதாக கூறப்படுகிறது. டைட்டில் அறிவிப்பதற்கு முன்னரே ஒருசில ஏரியாக்களின் வியாபாரம் நடந்துவிட்டதாக செய்திகள் வெளிவந்த நிலையில், தற்போது தமிழகம் முழுவதும் கிட்டத்தட்ட முழு வியாபாரமும் முடிந்துவிட்டதாக தகவல்கள் வந்துள்ளது. தமிழகத்தில் மட்டுமே 'வேதாளம்' சுமார் ரூ.40 கோடி அளவில் நடந்துள்ளதாகவும், இதுவரையிலான அஜீத் பட வியாபாரங்களில் இதுவே பெரிய தொகை என்றும் கூறப்படுகிறது.

தமிழகம் தவிர ஆந்திரா, கர்நாடகா, கேரளா மற்றும் வெளிநாட்டு உரிமைகளின் வியாபாரங்களும், வெளிநாடு மற்றும் தொலைக்காட்சி உரிமைகளின் வியாபாரங்களின் தொகையை சேர்த்தால் மிகப்பெரிய தொகையாக அமையும் என்றும் கூறப்படுகிறது.

அஜீத், ஸ்ருதிஹாசன், லட்சுமிமேனன், கபீர்தாஸ், ராகுல்தேவ், சூரி, தம்பி ராமையா மற்றும் பலர் நடித்துள்ள இந்த படத்திற்கு அனிருத் இசையமைத்துள்ளார். சிறுத்தை சிவா இயக்கியுள்ள இந்த படத்தை ஏ.எம்.ரத்னம் தயாரித்துள்ளார். இந்த படம் வரும் தீபாவளி தினத்தில் வெளியாகவுள்ளது.