లాలా భీమ్లా డీజే సాంగ్ వచ్చేసింది... ఇక రచ్చ రచ్చే
- IndiaGlitz, [Saturday,January 01 2022]
పవర్‌స్టార్ పవన్ కల్యాణ్ అభిమానులకు భీమ్లా నాయక్ చిత్ర యూనిట్ న్యూఇయర్ గిఫ్ట్ ఇచ్చింది. ఈ మూవీలోని ‘‘లాలా భీమ్లా’’ సాంగ్ డీజే వర్షన్‌ను రిలీజ్ చేశారు. పాటను ప్రముఖ దర్శకుడు త్రివిక్రమ్ శ్రీనివాస్ రచించగా.. కౌండిన్య అలపించారు. విడుదలైన కాసేపటికే ఈ సాంగ్‌కి భారీ వ్యూస్, లైకులు, కామెంట్లు వస్తున్నాయి. న్యూ ఇయర్‌ వేడుకల్లో సౌండ్‌ బాక్సులు దద్దరిల్లిపోవడం ఖాయం అంటూ పవన్ ఫ్యాన్స్ కామెంట్లు చేస్తున్నారు.
కాగా... ‘‘భీమ్లా నాయ్’’ను సంక్రాంతి కానుకగా జనవరి 12న తొలుత రిలీజ్ చేయాలని మేకర్స్ భావించారు. అయితే దీనికి ముందు వెనుకా రాధేశ్యామ్, ఆర్ఆర్ఆర్ వంటి పాన్ ఇండియా సినిమాలు రిలీజ్ కానుండటంతో చిత్ర పరిశ్రమ, ఎగ్జిబిటర్లు, డిస్ట్రిబ్యూటర్ల శ్రేయస్సును దృష్టిలో వుంచుకుని మహా శివరాత్రి కానుకగా ఫిబ్రవరి 25కి భీమ్లా నాయక్ వాయిదా పడింది. ఈ నిర్ణయంతో పవన్ ఫ్యాన్స్ బాగా డిజప్పాయింట్ అయ్యారు. సంక్రాంతికి తమ హీరో సినిమా చూద్దామనుకున్న ఫ్యాన్స్ నిరాశకు లోనవ్వడంతో వారిని ఖుషీ చేసేందుకే ‘‘లాలా భీమ్లా’’ డీజే వర్షెన్‌ను విడుదల చేస్తున్నట్లు మేకర్స్ అనౌన్స్ చేసిన సంగతి తెలిసిందే.
ఈ సినిమాలో పవర్‌స్టార్ ‘భీమ్లా నాయక్’ అనే పోలీస్ ఆఫీసర్ పాత్రలో నటిస్తున్నారు. మలయాళంలో హిట్టైన ‘అయ్యప్పనుమ్ కోషియుమ్’ మూవీ రీమేక్‌గా దీనిని తెరకెక్కిస్తున్నారు. స్టార్ డైరెక్టర్ త్రివిక్రమ్ కథ, స్క్రీన్ ప్లే అందిస్తున్నారు. పవన్‌కు జోడీగా నిత్యామీనన్‌, రానాకు జంటగా సంయుక్త మీనన్ నటిస్తున్నారు. సితార ఎంటర్‌టైన్‌మెంట్స్‌ బ్యానర్‌పై సూర్యదేవర నాగవంశీ ‘‘భీమ్లా నాయక్’’ను నిర్మిస్తున్నారు. ఇటీవలే వికారాబాద్‌లో కొత్త షెడ్యూల్ ప్రారంభమైంది.