சிம்புவுடன் சீரியஸாக விவாதம் செய்த லட்சுமி ராமகிருஷ்ணன்
- IndiaGlitz, [Wednesday,June 07 2017]
பெண்ணுரிமை, பெண்களுக்கு எதிராக நடைபெறும் கொடுமைகளுக்கு அவ்வப்போது குரல் கொடுப்பவர் நடிகை லட்சுமி ராமகிருஷ்ணன் என்பது தெரிந்ததே. அதுமட்டுமின்றி தனது மனதில் தோன்றும் கருத்துக்களை பின்விளைவுகள் குறித்து கவலைப்படாமல் வெளிப்படையாக பேசக்கூடியவர்.
இதேபோல் தைரியமாக தனது கருத்தை வெளியிடும் நடிகர்களில் ஒருவர் சிம்பு. தனது தைரியமான கருத்துக்களால் சர்ச்சைகள் ஏற்பட்டாலும் அதைப்பற்றி கவலைப்படாமல் துணிச்சலுடன் செயல்படுபவர் சிம்பு.
இந்த நிலையில் சிம்பு மற்றும் லட்சுமி ராமகிருஷ்ணன் ஆகிய இருவரும் தொலைபேசி மூலம் சமீபத்தில் தங்களுடைய கருத்துக்களை பகிர்ந்து கொண்டுள்ளனர். இதுகுறித்து தனது சமூக வலைத்தள பக்கத்தில் கூறியுள்ள லட்சுமிராமகிருஷ்ணன், 'சிம்பு எனக்கு போன் செய்திருந்தார். இரண்டு பேருமே எங்களுடைய கருத்தை பரிமாறிக் கொண்டோம். பெண்களுக்கு எதிராக நடக்கும் கொடுமைகளுக்கு குரல் கொடுக்குமாறு நான் அவரிடம் கேட்டுக் கொண்டேன். தன்னை ஒரு பெரிய ஸ்டாராக காட்டிக் கொள்ளாமல் என்னிடம் அவர் பேசினார்' என்று கூறியுள்ளார்.
கடந்த சில நாட்களுக்கு முன்னர்தான் சிம்பு நடித்து வரும் 'அன்பானவன் அசராதவன் அடங்காதவன்' படத்தின் நாயகி தமன்னாவின் உடை குறித்து லட்சுமிராமகிருஷ்ணன் கடுமையாக விமர்சனம் செய்திருந்தார் என்பது குறிப்பிடத்தக்கது.