சிபிராஜ் நடித்த 'நாய்கள் ஜாக்கிரதை' படத்டை இயக்கிய சக்தி செளந்திரராஜன் தற்போது ஜெயம் ரவி நடிப்பில் ஒரு புதிய படத்தை இயக்கி வருவது குறித்து ஏற்கனவே பார்த்தோம். இந்நிலையில் இந்த படத்தில் நாயகியாக நடித்து வரும் லட்சுமி மேனக்கு பேய் வேடம் என்று பல ஊடகங்களில் செய்திகள் வெளிவந்துள்ள நிலையில் இயக்குனர் சக்தி இதுகுறித்து தற்போது விளக்கம் அளித்துள்ளார்.

இந்த படத்தில் லட்சுமி மேனன் நடித்து வருவது உண்மைதான். ஆனால் செய்திகள் வெளிவந்த மாதிரி அவர் பேய் கேரக்டரில் நடிக்கவில்லை. அவர் பேயாக நடித்து வருகிறார் என்பது ஒரு வதந்தியே. மேலும் இந்த படமே பேய் சம்பந்தப்பட்ட கதை இல்லை. இது ஒரு வித்தியாசமான வேறு ஒரு களம்' என்று கூறிய சக்தி செளந்திரராஜன், இந்த படத்திலும் லட்சுமி மேனன் மீண்டும் கிராமத்து பெண்ணாக நடிக்கின்றார். ஆனால் இதுவரை தமிழ் சினிமா பார்க்காத வித்தியாசமான கிராமத்து பெண் வேடம் லட்சுமி மேனனுக்கு கிடைத்துள்ளது' என்று கூறியுள்ளார்.

இந்த படத்தின் முதல்கட்ட படப்பிடிப்பு ஊட்டியில் நடந்து முடிந்துள்ள நிலையில் இரண்டாவது கட்ட படப்பிடிப்பு சென்னை மற்றும் ஐதராபாத் நகரில் நடைபெறவுள்ளதாகவும், 'என்னை அறிந்தால்' படத்தில் அஜீத் மகளாக நடித்த அங்கிதாவுக்கு இந்த படத்தில் திருப்புமுனையை ஏற்படுத்தும் கேரக்டர் என்றும் அவர் கூறியுள்ளார். இந்த படத்திற்கு இசையமைக்க டி.இமான் ஒப்பந்தம் செய்யப்பட்டுள்ளார் என்பது குறிப்பிடத்தக்கது.