ఎస్.. రీ ఎంట్రీ ఇస్తున్నా.. : సీనియర్ నటి లైలా
- IndiaGlitz, [Tuesday,September 24 2019]
లైలా.. ఈ సీనియర్ నటి గురించి టాలీవుడ్ ప్రియులకు ప్రత్యేకించి మరీ చెప్పనక్కర్లేదు. అప్పుడెప్పుడో ‘ఎగిరే పావురమా’ సినిమాతో టాలీవుడ్‌లోకి ఎంట్రీ ఇచ్చిన ఈ భామ.. తన అంద చెందాలతో కుర్రకారు మనసును దోచుకుంది. అలా లైలా సినిమాలంటే యూత్ సినిమా థియేటర్లకు పరుగులు తీసేవారు. ‘ఉగాది’, ‘పెళ్లిచేసుకుందాం’, ‘పవిత్రప్రేమ’ వంటి సినిమాల్లో నటించడంతో అప్పట్లో స్టార్ హీరోయిన్ల జాబితాలో ఈ ముద్దుగుమ్మ చేరిపోయింది. ఇలా ఒక్క తెలుగులోనే కాదు తమిళ, మలయాళ, కన్నడ, హిందీ భాషల్లో కలుపుకుని మొత్తం హాఫ్ సెంచరీ పూర్తి చేసుకుంది. ఆ తర్వాత పెళ్లి చేసుకుని ఇండస్ట్రీకి పూర్తిగా దూరమైంది. 2006 తర్వాత లైలా స్క్రీన్‌పై ఎక్కడా కనిపించలేదు.
ఇటీవల నందమూరి బాలయ్యతో సెల్ఫీ తీసుకొని వార్తల్లోకెక్కింది. ఈ మధ్య మళ్లీ ఫామ్‌లోకి వచ్చిన భామ సినిమాల్లో నటిస్తానంటూ చెబుతోంది. ఓ టాప్ చానెల్‌కు ఇచ్చిన ఇంటర్వ్యూలో ఈ సీనిర్ భామ ఆసక్తికర వ్యాఖ్యలు చేసింది. తెలుగు చిత్రపరిశ్రమ అంటే తనకు చాలా ఇష్టమని చెప్పింది. అంతటితో ఆగని ఈమె తమిళ చిత్రపరిశ్రమకి ఫస్ట్ మార్కులు.. ఆ తర్వాత టాలీవుడ్‌కు మార్కులేస్తానని చెప్పుకొచ్చింది. ఎందుకంటే తెలుగు, తమిళంలో చాలా చిత్రాల్లో నటించానని.. అందరూ తనను ప్రోత్సహించారని పాత రోజులను ఆమె గుర్తుకు తెచ్చుకుంది.
అందుకే తాను మళ్లీ టాలీవుడ్, కోలీవుడ్‌లోకి ఓ మంచి సినిమాతో రీ ఎంట్రీ ఇస్తున్నానని చెప్పుకొచ్చింది. త్వరలో సెకండ్ ఇన్నింగ్స్ మొదలపెట్టనుందన్న మాట. కాగా.. లైలా నటించబోయే సినిమాకు సంబంధించి ప్రస్తుతం చర్చలు జరుగుతున్నాయని తెలిపింది. ఈ సందర్భంగా.. గతంలో పనిచేయలేకపోయిన దర్శకులతోను కలిసి పనిచేయాలని వుందని తన మనసులోని మాటను లైలా బయటపెట్టింది. అయితే లైలా రీ ఎంట్రీ ఇవ్వబోయే సినిమా ఏంటి..? ఆ సినిమాలో ఈ ముద్దుగుమ్మ పాత్రేంటి..? హీరోయిన్‌గా నటిస్తుందా లేకుంటే చిన్నపాటి పాత్రేనా అనేది తెలియాల్సి ఉంది.