సోషల్ మీడియా రాకతో ఏది నిజమో ... ఏది అబద్ధమో తెలుసుకోవడం జనాలకు ఇబ్బందిగా మారుతోంది. అదిగో పులి అంటే ఇదిగో తోక అనే బ్యాచ్ ఇటీవల కాలంలో ఎక్కువైంది. దీని కారణంగా తప్పుడు వార్తలు బాగా వైరల్ అవుతున్నాయి. ఇలాంటి వారి వల్ల సెలబ్రెటీలు, ప్రముఖులు తీవ్ర ఇబ్బందులు పడుతున్నారు. ముఖ్యంగా సినీ పరిశ్రమకు చెందిన వారే ఇలాంటి వారికి టార్గెట్ అవుతున్నారు. తాజాగా హీరోయిన్ సమంత, హీరో విజయ దేవరకొండలకు ప్రమాదం జరిగిందంటూ వార్తలు గుప్పుమన్నాయి. ప్రస్తుతం వీరిద్దరూ ఖుషి అనే ఓ లవ్ రొమాంటిక్ ఎంటర్‌టైనర్‌లో నటిస్తున్న సంగతి తెలిసిందే. మైత్రి మూవీ మేకర్స్ నిర్మాణంలో శివ నిర్వాణ ఈ సినిమాను తెరకెక్కిస్తున్నారు. గడిచిన కొద్దిరోజులుగా కాశ్మీర్‌లో ఈ సినిమా షూటింగ్ జరుగుతోంది.

అయితే కాశ్మీర్‌లోని పహల్గామ్ ప్రాంతంలో ఓ యాక్షన్ సీక్వెన్స్ చేస్తుండగా సమంత, విజయ్‌లు గాయపడినట్లుగా వార్తలు హల్ చల్ చేస్తున్నాయి. షూటింగ్ నిమిత్తం వీరిద్దరూ ఓ నదికి ఇరువైపులా కట్టిన తాడు బ్రిడ్జిపై వాహనాన్ని డ్రైవ్ చేయాలి. అయితే ఆ వాహనం అదుపు తప్పడంతో సమంత, విజయ్‌లు నదిలో పడిపోయారని.. ఈ ఘటనలో వీరిద్దరికి స్వల్ప గాయాలైనట్లు నిన్నటి నుంచి కథనాలు వస్తున్నాయి.

ఈ నేఫథ్యంలో చిత్ర యూనిట్ స్పందించింది. విజయ్ దేవరకొండ, సమంతకు గాయాలు అంటూ జరుగుతోన్న ప్రచారంలో ఎలాంటి నిజం లేదని స్పష్టం చేసింది. కాశ్మీర్‌లో షూటింగ్ చేసుకుని యూనిట్ మొత్తం క్షేమంగా హైదరాబాద్‌ వచ్చేసిందని ఖుషీ యూనిట్ పేర్కొంది. రెండో షెడ్యూల్ అతి త్వరలోనే మొదలు కానుందని...దయచేసి ఎలాంటి పుకార్లు నమ్మొద్దు చిత్ర యూనిట్ ప్రజలకు విజ్ఞప్తి చేసింది. కాగా.. ఈ సినిమాను కిస్మస్ కానుకగా తెలుగు , తమిళ, మలయాళ, కన్నడ భాషల్లో డిసెంబర్ 23న విడుదల చేసేందుకు చిత్ర యూనిట్ సన్నాహాలు చేస్తోంది.