நீண்ட நாள் காதலியை கரம் பிடித்தார் கும்கி நடிகர்: திரையுலகினர் வாழ்த்து
- IndiaGlitz, [Wednesday,June 24 2020]
இயக்குனர் எம் ராஜேஷ் இயக்கிய ’பாஸ் என்ற பாஸ்கரன்’ என்ற திரைப்படத்தில் நகைச்சுவை நடிகராக அறிமுகமான தயாரிப்பாளர் சுவாமிநாதனின் மகன் அஸ்வின். இந்த படத்தின் வெற்றிக்கு பின்னர் ’வந்தான் வென்றான்’ ’தில்லு முல்லு’ ஆகிய படங்களில் நடித்தாலும் அஸ்வினுக்கு பேரும் புகழும் பெற்று தந்த திரைப்படம் பிரபு சாலமன் இயக்கிய ’கும்கி’ திரைப்படம் தான். இந்த படத்தில் இவருடைய கேரக்டர் வெகுவாக புகழப்பட்டது என்பதும், இதனை அடுத்து அவருக்கு ’கும்கி அஸ்வின்’ என்ற பெயர் கோலிவுட்டில் ஏற்பட்டது என்பதும் குறிப்பிடத்தக்கது.
இந்த நிலையில் கும்கி அஸ்வின், வித்யாஸ்ரீ என்ற பெண்ணை கடந்த சில ஆண்டுகளாக காதலித்து வந்தார். வித்யாஸ்ரீ அமெரிக்காவில் எம்எஸ் படித்து முடித்து உள்ளார் என்பது குறிப்பிடத்தக்கது. இந்த காதலுக்கு இருவீட்டாரும் சம்மதம் தெரிவித்ததையடுத்து சமீபத்தில் இவர்களது நிச்சயதார்த்தம் நடந்தது என்ற செய்தியை பார்த்தோம்
இந்த நிலையில் இன்று இவர்களது திருமணம் இருவீட்டார் முன்னிலையில் சிறப்பாக நடந்துள்ளது. தமிழக அரசின் ஊரடங்கு கட்டுப்பாடு காரணமாக இரு வீட்டாரின் தரப்பில் 20 பேர் மட்டுமே இந்த திருமணத்தில் கலந்து கொண்டனர். இருப்பினும் ஏராளமான திரையுலக நண்பர்கள் போன் மூலம் அஸ்வினுக்கு தங்களது வாழ்த்துக்களை தெரிவித்தனர் என்பது குறிப்பிடத்தக்கது. லாக்டவுன் முடிந்தவுடன் இவர்களது வரவேற்பு நிகழ்ச்சி பிரம்மாண்டமாக நடத்தப்படும் என்று எதிர்பார்க்கப்படுகிறது