கறிவிருந்து வைத்து கொரோனா திருவிழாவை கொண்டாடிய இளைஞர்: அள்ளிச்சென்ற போலீஸ்
- IndiaGlitz, [Thursday,April 16 2020]
உலகம் முழுவதும் கொரோனா வைரசால் கொத்துக் கொத்தாக உயிர்கள் பலியாகிக் கொண்டிருக்கும் நிலையில் கும்பகோணத்தைச் சேர்ந்த ஒரு இளைஞன் கொரோனாவை திருவிழாவாக கொண்டாடி இருப்பது பெரும் அதிர்ச்சியை ஏற்படுத்தியுள்ளது.
கும்பகோணம் அருகே உள்ள தியாகசமுத்திரம் என்ற பகுதியை சேர்ந்த சிவகுரு என்ற இளைஞர் அந்த பகுதியில் உள்ள இளைஞர்களை அழைத்து வயல்வெளி ஒன்றில் நீண்ட இலைகளை போட்டு அதில் சிக்கன் குழம்பு உடன் கூடிய சாப்பாட்டை விருந்து வைத்து அசத்தி உள்ளார்.
கொரோனா விருந்து என்ற பெயரில் இவர் வைத்த இந்த விருந்து நிகழ்ச்சியை அவர் சமூக வலைதளங்களில் நேரடியாக ஒளிபரப்பவும் செய்துள்ளார். சமூக விலகலை பின்பற்றாமல் ஊரடங்கு உத்தரவை மதிக்காமல் இவர் இந்த விருந்து வைத்தது குறித்து கேள்விப்பட்ட காவல்துறையினர் சிவகுருவையும் அந்த விருந்தில் கலந்து கொண்ட சிலரையும் காவல் நிலையத்துக்கு அழைத்து சென்று விசாரணை செய்து வருகின்றனர்.
உலகமே கொரோனாவை கண்டு அஞ்சி நடுங்கிக் கொண்டிருக்கும் நிலையில் இந்த இளைஞர் மட்டும் கொரோனாவை திருவிழா போல் கொண்டாடி உள்ளது அவர்களது அறியாமையை வெளிப்படுத்தி உள்ளதாக அந்த பகுதி மக்கள் கூறியுள்ளனர்.