‘రాహు’ మూవీ హీరోయిన్ కృతి గార్గ్‌‌కు ‘అర్జున్ రెడ్డి’ దర్శకుడు సందీప్ రెడ్డి వంగ పేరుతో ఓ వ్యక్తి కాల్ చేసి ట్రాప్ చేశాడని వార్తలు వెల్లువెత్తిన సంగతి తెలిసిందే. యంగ్ రెబల్ స్టార్ ప్రభాస్ పక్కన హీరోయిన్‌గా చేయాలని ఆ బ్యూటీని అడగ్గా ఏ మాత్రం ఆలోచించకుండా.. ముంబై వెళ్లిపోయింది. ఆమె హైదరాబాద్ నుంచి వెళ్లినప్పట్నుంచి ఫోన్ కలవకపోవడం.. ఎక్కడుందో తెలియకపోవడంతో డైరెక్టర్ సుబ్బు నగరంలోని పంజాగుట్ట పోలీస్ స్టేషన్‌లో ఫిర్యాదు చేశాడు. ఈ మేరకు ఫిర్యాదు స్వీకరించిన పోలీసులు మిస్సింగ్ కేసుగా నమోదు చేసుకుని దర్యాప్తు చేస్తున్నారు. అయితే.. ఈ మొత్తం వ్యవహారంపై కృతీ ఓ వీడియో తీసి సోషల్ మీడియాలో పోస్ట్ చేసింది.

నేను సేఫ్‌గానే ఉన్నా..!
‘నన్ను ఎవరూ కిడ్నాప్ చేయలేదు. సోమవారం పొద్దున్నే తాను ముంబైకు చేరుకున్నాను. ప్రస్తుతం నా ఇంట్లోనే ఉన్నాను. వర్క్ స్ట్రెస్ వల్ల నేను మొబైల్‌లో అందుబాటులో లేను. రాహు మూవీ డైరెక్టర్ సుబ్బు ఫోనే చేసినపుడు నేను అందుబాటులో లేకపోవడం వల్ల ఆయన టెన్షన్ పడి పోలీసులకు ఫిర్యాదు చేశారు. నేను ప్రస్తుతం సేఫ్‌గానే ఉన్నాను’ అని ఆ వీడియోలో చెప్పుకొచ్చింది.

మూవీ ప్రమోషన్ కోసమేనా!?
ఈ వ్యహారంపై నెటిజన్లు, సినీ ప్రియులు తీవ్ర ఆగ్రహం వ్యక్తం చేస్తున్నారు. ఏంటిది..? జనాలతో ఆడుకుంటున్నారా ఏంటి..? ఆమె ఏమో నేనే ఇంటికెళ్లానంటోంది.. సుబ్బు ఏమో పోలీసులకు ఫిర్యాదు చేశారు.. ఎంటీ ఓవరాక్షన్ సినిమా ప్రమోషన్ కోసం ఏమైనా చేస్తేస్తారా..? డ్రామాలాపండి.. సినిమా ప్రమోషన్స్ కోసమే మీరు ఇదంతా చేస్తున్నారని మాకు తెలిసిపోయిందిలెండి అంటూ నెట్టింట్లో తీవ్ర ఆగ్రహం వ్యక్తం చేస్తున్నారు.

హీరోయిన్‌కు ఫోన్‌లో ఏం చెప్పారు..!?
‘రాహు’ సినిమాలో మీ నటన అద్భుతంగా ఉంది. మీలాంటి ప్రతిభ కలిగిన హీరోయిన్ దొరకడం మా అదృష్టం. ప్రభాస్ పక్కన హీరోయిన్‌గా చేయాలి.. మీరు స్టోరీ వినడానికి ముంబైకి రండి’ అని ఓ అజ్ఞాత వ్యక్తి ఫోన్‌లో ఆహ్వానించాడు.

ఫిర్యాదు చేసిన అనంతంరం..!
పంజాగుట్ట పోలీస్ స్టేషన్‌లో ఫిర్యాదు చేసిన అనంతరం సుబ్బు మీడియాతో మాట్లాడాడు. ‘సందీప్ రెడ్డి వంగ పేరుతో గత ఐదు రోజులుగా ఒక వ్యక్తి కృతికి ఫోన్ చేస్తున్నాడు. ‘రాహు’లో మీ నటన చాలా బాగుంది.. మీ లాంటి టాలెంటెడ్ హీరోయిన్ కోసమే వెతుకుతున్నాను.. ప్రభాస్ పక్కన హీరోయిన్‌గా మిమ్మల్ని తీసుకుంటాను అని చెప్పాడు. ఆమె కాన్ఫరెన్స్‌లో నన్ను కూడా కలిపింది. అతను నాతో రెండు గంటలపాటు మాట్లాడాడు. సందీప్ రెడ్డి నాతో రెండు గంటలు ఎందుకు మాట్లడతారు..? అని అప్పుడే నాకు అనుమానం వచ్చింది. కానీ, ఆయన మాటలు నేను ఎప్పుడూ వినలేదు. ఫోన్ పెట్టేసిన తరవాత యూట్యూబ్‌లో సందీప్ ఇంటర్వ్యూలు చూశాను. వాయిస్ అతనిది కాదని నిర్ధారించుకున్నాను. ముంబైలో ఉంటోన్న కృతి ఆదివారం అక్కడకు బయలుదేరి వెళ్లారు. అయితే, సోమవారం ఉదయం నుంచి కృతి ఫోన్ కలవడం లేదని.. అందుకే, భయమేసి పోలీసులకు ఫిర్యాదు చేశాను’ అని మీడియా వెల్లడించాడు. అయితే.. మహిళల సాధికారత కోసం తాను సినిమా చేస్తే.. ఈ సినిమాలో నటించిన అమ్మాయికే ఇలా కావడం చాలా బాధాకరమని సుబ్బు తీవ్ర ఆవేదన వ్యక్తం చేస్తూ కంటతడి పెట్టారు.

ట్రాక్ చేస్తే పరిస్థితీ ఇదీ..!
కాగా.. ఆ నంబర్‌ను పోలీసులు ట్రేస్ చేశారు. అది అనంతపురానికి చెందిన నరేష్ అనే వ్యక్తి నంబర్‌గా చూపిస్తుంది. ప్రస్తుతం పోలీసులు విచారణ జరుపుతున్నారు. మరి పోలీసులు ఏం తేలుస్తారో..? ఏంటో వేచి చూడాల్సిందే.