తెలుగు సినిమాను సాంకేతికంగా కొత్త పుంత‌లు తొక్కించే దిశ‌గా అడుగులు వేసిన హీరోల్లో సూప‌ర్‌స్టార్ కృష్ణ ఎప్పుడూ ముందుంటారు. 350 సినిమాల్లో న‌టించిన కృష్ణ‌.. నిర్మాత‌గానే కాదు, ద‌ర్శ‌కుడిగానూ సినిమాల‌ను తెర‌కెక్కించి స‌క్సెస్ అయ్యారు. ఇప్పుడు ఆయ‌న వ‌య‌సు మీర‌డంతో రెస్ట్ తీసుకుంటున్నారు. ఆయన వార‌సుడిగా మ‌హేశ్‌బాబు అగ్ర క‌థానాయ‌కుడిగా రాణిస్తోన్న సంగ‌తి తెలిసిందే. ఘ‌ట్ట‌మ‌నేని ఫ్యామిలీ నుండి మూడో త‌రం వార‌సులు వెండితెర‌పై త‌మ అదృష్టాన్ని ప‌రీక్షించుకోవ‌డానికి సిద్ధ‌మ‌వుతున్నారు.

వివ‌రాల్లోకెళ్తే..మ‌హేశ్ మేన‌ల్లుడు.. గ‌ల్లా జ‌య‌దేవ్‌, ప‌ద్మావ‌తిల కుమారుడు గ‌ల్లా అశోక్ హీరోగా సినిమా తెర‌కెక్కుతోన్న సంగ‌తి తెలిసిందే. శ్రీరామ్ ఆదిత్య ద‌ర్శ‌క‌త్వం వ‌హిస్తోన్న ఈ సినిమా లొకేష‌న్‌కు ఓసారి కృష్ణ వెళ్లార‌ట‌. కృష్ణ‌కు పెద్ద ఫ్యాన్ అయిన డైరెక్ట‌ర్ శ్రీరామ్ ..ఆయ‌న్ని ఓ కోరిక కోరాడు. అదేంటంటే ఓ స‌న్నివేశాన్ని డైరెక్ట్ చేయ‌మ‌ని. ఫ్యాన్ కోరిక‌ను కాద‌న‌లేక‌, మ‌రో ప‌క్క మ‌న‌వ‌డి కోసం కృష్ణ మ‌రోసారి డైరెక్ట‌ర్‌గా మారారు. ఓ స‌న్నివేశాన్ని చిత్రీక‌రించార‌ట‌. క‌రోనా వైర‌స్ ప్ర‌భావంతో షూటింగ్ ఆగిన ఈ సినిమా త్వ‌ర‌లోనే విడుద‌ల‌కు సిద్ధ‌మ‌వుతోంది. ఇందులో నిధి అగ‌ర్వాల్ హీరోయిన్‌గా న‌టిస్తోంది.