ప్ర‌భాస్‌తో మ‌రోసారి కొరటాల శివ
- IndiaGlitz, [Monday,April 30 2018]
మిర్చి, శ్రీ‌మంతుడు, జ‌న‌తా గ్యారేజ్‌, భ‌ర‌త్ అనే నేను.. ఇలా వ‌రుస‌గా నాలుగు విజ‌యాలు సొంతం చేసుకుని సెన్సేష‌న‌ల్ డైరెక్ట‌ర్ అయిపోయారు కొరటాల శివ. ర‌చ‌యితగా కెరీర్‌ని ప్రారంభించి ఆన‌క ద‌ర్శ‌కుడి అవ‌తార‌మెత్తిన కొర‌టాల‌కి.. ద‌ర్శ‌కుడిగా తొలి అవ‌కాశ‌మిచ్చిన ఘ‌న‌త ప్ర‌భాస్‌దే. అంతేకాదు.. మిర్చి చిత్రం ఒక విధంగా ప్రభాస్ సొంత సినిమా కూడా.
అలాంటి ప్ర‌భాస్‌తో మ‌రో సినిమా చేసేందుకు కొరటాల స్క్రిప్ట్ సిద్ధం చేసుకుంటున్నార‌ని టాలీవుడ్ వ‌ర్గాలు పేర్కొంటున్నాయి. ఒక ప్ర‌ముఖ నిర్మాణ సంస్థ నిర్మించ‌బోయే ఈ భారీ బ‌డ్జెట్ చిత్రానికి సంబంధించిన పూర్తి వివ‌రాలను అతి త్వ‌ర‌లోనే వెల్ల‌డించ‌నున్నారు.
ప్ర‌స్తుతం ప్రభాస్.. తెలుగు, త‌మిళ, హిందీ భాష‌ల్లో సాహో చిత్రాన్ని చేస్తున్నారు. ఆ సినిమా పూర్త‌య్యేలోపే జిల్ ద‌ర్శ‌కుడు రాధా కృష్ణ డైరెక్ష‌న్‌లో మ‌రో సినిమాని ప‌ట్టాలెక్కించ‌నున్నారు. ఈ రెండు చిత్రాలు కూడా వ‌చ్చే ఏడాది తెర‌పైకి రానున్నాయి. ఈ నేప‌థ్యంలో.. కొరటాల శివ వ‌చ్చే ఏడాది ఆరంభంలో ప‌ట్టాలెక్కే అవ‌కాశం క‌నిపిస్తోంది.