கடந்த 1992ஆம் ஆண்டு கமல்ஹாசன் நடித்த 'குணா' படத்தில் 'கண்மணி அன்போடு' என்ற பாடல் காட்சி இடம்பெற்ற இடத்தை யாரும் அவ்வளவு எளிதில் மறந்திருக்க முடியாது. கொடைக்கானலில் உள்ள ஆபத்தான குகை ஒன்றில் இந்த பாடல் காட்சி படமாக்கப்பட்டது. இந்த படம் வெளிவந்த பின்னர் இந்த குகை 'குணா குகை' என்று அழைக்கப்பட்டதோடு, கொடைக்கானலுக்கு சுற்றுலா வரும் சுற்றுலாப்பயணிகள் தவறாமல் பார்க்கும் ஒரு இடமாகவும் மாறியது.

ஆனால் இந்த குகை செல்லும் வழி ஆபத்து நிறைந்ததாக இருந்ததால் ஆபத்தான பள்ளத்தில் விழுந்து பலர் உயிரிழந்தனர். இதன் காரணமாக இந்த குகை பத்தாண்டுகளுக்கு முன்னர் மூடப்பட்டது.

இந்த நிலையில் சுற்றுலா பயணிகளின் கோரிக்கையை ஏற்று இந்த குகைக்கு செல்லும் பாதை சீரமைக்கப்பட்டது. தற்போது மரப்பாலம் அமைக்கும் பணி விறுவிறுப்பாக நடைபெற்று வருவதால் மிக விரைவில் இந்த குகையை பார்க்க சுற்றுலா பயணிகள் அனுமதிக்கப்படுவார்கள் என்ற தகவல் வெளிவந்துள்ளது. இந்த தகவல் கொடைக்கானல் வரும் சுற்றுலாப்பயணிகளுக்கு ஒரு மகிழ்ச்சியான செய்தி என்பது குறிப்பிடத்தக்கது.