అనుష్క ఇండ‌స్ట్రీకి వ‌చ్చి 15 ఏళ్లు అవుతుంది. ఈ ఏడాది ఆమె న‌టించిన నిశ్శ‌బ్దం సినిమా కూడా విడుద‌ల‌వుతుంది. ఈ సంద‌ర్భంలో అనుష్క 15 సంవ‌త్స‌రాల వేడుక జ‌రిగింది. ఇందులో ఆమెతో పాటు ప‌నిచేసిన ద‌ర్శ‌కులు, నిర్మాత‌లు పాల్గొన్నారు. వారిలో అనుష్క‌ను స్టార్‌ని చేసిన సినిమా అరుంధ‌తి నిర్మాత శ్యాంప్ర‌సాద్ రెడ్డి పాల్గొన్నారు. ఆయ‌న అనుష్క ఎంత మంచి వ్య‌క్తి అని అన‌డ‌మే కాకుండా.. ఆమె మంచిత‌నం గురించి ఓ ఉదాహ‌ర‌ణ‌ను వివ‌రించారు. అనుష్క ఓ సినిమా షూటింగ్ కోసం జార్జియా వెళ్లిన‌ప్పుడు అక్క‌డ ఆమెకు జాజ అనే ర‌ష్య‌న్ డ్రైవ‌ర్, కేర్ టేక‌ర్‌ను నియ‌మించారు. నాలుగైదు రోజుల్లో జాజ‌, అనుష్క మంచి స్నేహితుల‌య్యారు.

రెండు వారాల త‌ర్వాత జాజ స్థానంలో మ‌రో డ్రైవ‌ర్ వ‌చ్చాడట‌. అదేంటి.. జాజ ఏమ‌య్యాడు? అని అనుష్క అడిగితే అత‌ను ఫైనాన్స్ తీసుకుని క‌ట్ట‌లేక‌పోవ‌డంతో అత‌ని కారుని ఫైనాన్స్ చేసిన వాళ్లు తీసుకెళ్లిపోయార‌ని చెప్పార‌ట‌. అప్పుడు ప్రొడ‌క్ష‌న్ మేనేజ‌ర్‌తో చెప్పి జాజ‌ను వ‌చ్చి త‌న‌ను క‌ల‌వాల‌ని క‌బురు పంపింద‌ట‌. ఆ రోజు సాయంత్రం అనుష్క‌ని జాజ క‌లిశాడ‌ట‌. అత‌న్ని తీసుకుని కారు షోరూంకి వెళ్లి అత‌నికొక కారుని కొనిచ్చింద‌ట అనుష్క‌. అనుష్క పెద్ద మ‌న‌సు చూసి జాజ అత‌ని కుటుంబ స‌భ్యులు క‌న్నీటి ప‌ర్యంత‌మైయార‌ట‌.

ఈ విష‌యాన్ని అనుష్క ఎవ‌రితోనూ చెప్ప‌లేదు. రీసెంట్‌గా శ్యామ్ ప్ర‌సాద్‌రెడ్డి జార్జియా టూర్‌కి వెళ్లిన‌ప్పుడు అనుకోకుండా అనుష్క కేర్ టేక‌ర్‌గా వ్య‌వ‌హ‌రించిన జాజ‌నే.. ఈయ‌న‌కు కూడా డ్రైవ‌ర్ కేర్ టేక‌ర్‌గా వ్య‌వ‌హ‌రించాడు. మాట‌ల క్ర‌మంలో అనుష్క త‌న‌కు చేసిన సాయాన్ని జాజ చెప్పుకొచ్చాడట‌. అనుష్క చేసిన సాయం తెలిసి శ్యామ్ ప్ర‌సాద్ రెడ్డికి ఆమె పెద్ద మ‌న‌సును అభినందించ‌కుండా ఉండ‌లేక‌పోయాడ‌ట‌.