2016-2020 మధ్య ఎంతమంది పార్టీ మారారో తెలిస్తే..
- IndiaGlitz, [Friday,March 12 2021]
దేశవ్యాప్తంగా పార్టీలు మారిన వారిపై అసోసియేషన్‌ ఫర్‌ డెమొక్రటిక్‌ రిఫార్మ్స్‌ (ఏడీఆర్) ఓ సర్వే చేపట్టింది. ముఖ్యంగా 2016-2020 మధ్య జరిగిన వివిధ ఎన్నికల్లో ఏ ఏ పార్టీలకు చెందిన ఎంతమంది పార్టీలు మారారనే దానిపై సమగ్ర నివేదికను అందించింది. పార్టీ మారిన వారిలో ఎక్కువ మంది కాంగ్రెస్ పార్టీకి చెందిన వారే ఉండటం విశేషం. మొత్తం 170 మంది కాంగ్రెస్ ఎమ్మెల్యేలు ఆ పార్టీని వీడినట్టు ఏడీఆర్ నివేదిక వెల్లడించింది. అలాగే బీజేపీ నుంచి కేవలం 18 మంది ఎమ్మెల్యేలు మాత్రమే పార్టీ మారారని పేర్కొంది.
ఆ నాలుగేళ్లలో మొత్తంగా 433 మంది ఎమ్మెల్యేలు, ఎంపీలు పార్టీలు మారినట్టు వారు సమర్పించిన అఫిడవిట్‌లను విశ్లేషించి ఏడీఆర్ తాజా నివేదికను విడుదల చేసింది. నాలుగేళ్లలో జరిగిన వివిధ ఎన్నికల్లో తిరిగి పోటీచేసిన 437 మంది ప్రజాప్రతినిధులు పార్టీలు మారారు. దేశవ్యాప్తంగా 53 పార్టీల నుంచి 405 మంది ఎమ్మెల్యేల్లో 182 మంది తమ పార్టీలు వీడి బీజేపీలోకి, 38 మంది కాంగ్రెస్‌లోకి, 25 మంది టీఆర్‌ఎస్‌లోకి మారారు. వీరిలో తిరిగి 209 మంది విజయం సాధించారు. 2016-19 మధ్యలో ఏడుగురు రాజ్యసభ ఎంపీలు కాంగ్రెస్ పార్టీని వీడారు.
కాగా.. 2016-20 మధ్య మొత్తం 16 మంది రాజ్యసభ సభ్యులు వివిధ పార్టీల నుంచి తిరిగి పోటీచేయగా.. వీరిలో 10 మంది బీజేపీలో చేరిపోయారు. ఇక 2019 లోక్‌సభ ఎన్నికల్లో ఐదుగురు లోక్‌సభ ఎంపీలు బీజేపీని వీడి ఇతర పార్టీల్లోకి చేరారు. మధ్యప్రదేశ్‌, మణిపూర్‌, గోవా, అరుణాచల్‌ ప్రదేశ్‌, కర్ణాటకల్లో ప్రభుత్వాలు కూలిపోవడానికి ప్రజాప్రతినిధులు పార్టీలు మారడమే కారణమని ఏడీఆర్ ఆ నివేదికలో స్పష్టం చేసింది. పార్టీల్లో చేరికలకు సంబంధించి టీఆర్ఎస్ మూడో స్థానంలో నిలిచింది. టీడీపీలోకి 11 మంది, వైసీపీలోకి ముగ్గురు చేరి పోటీ చేసినట్లు ఏడీఆర్ తెలిపింది.