தளபதி விஜய் நடித்து வரும் 'சர்கார்' படத்தின் படப்பிடிப்பு கிட்டத்தட்ட இறுதிக்கட்டத்தை நெருங்கிவிட்ட நிலையில் இந்த படத்தின் படப்பிடிப்பை இயக்குனர் ஏ.ஆர்.முருகதாஸ் இம்மாதத்திற்குள் முடித்துவிடுவார் என்று எதிர்பார்க்கப்படுகிறது. வரும் தீபாவளி அன்று திரைக்கு வரவுள்ள இந்த படத்திற்கு மிகப்பெரிய எதிர்பார்ப்பு உள்ளது என்பது குறிப்பிடத்தக்கது.

இந்த நிலையில் விஜய்யின் அடுத்த படத்தை இயக்குவது அட்லி என்று கிட்டத்தட்ட முடிவாகிவிட்டது. இந்த படம் குறித்த அதிகாரபூர்வ அறிவிப்பு வெளிவரவில்லை என்றாலும் இந்த படத்தின் ஆரம்பகட்ட பணிகள் தொடங்கிவிட்டதாகவும், இந்த படத்தை ஏஜிஎஸ் நிறுவனம் தயாரிக்கவுள்ளதாகவும் செய்திகள் வந்து கொண்டிருக்கின்றது.

இந்த நிலையில் 'தெறி', 'மெர்சல்' படத்திற்கு பின்னர் மீண்டும் விஜய்-அட்லி கூட்டணியில் உருவாகும் இந்த படத்தின் நாயகி யாராக இருக்கும் என்ற எதிர்பார்ப்பு விஜய் ரசிகர்கள் உள்பட அனைவரிடமும் இருந்தது. இந்த நிலையில் நடிகை கியாரா அத்வானி என்பவர் விஜய்-அட்லி படத்தின் நாயகி என்று கூறப்படுகிறது. இவர் தல தோனியின் வாழ்க்கை வரலாறு படத்தில் தோனியின் மனைவி சாக்சி கேரக்டரில் நடித்தவர் என்பது குறிப்பிடத்தக்கது.