కైరా అద్వాని మొదలుపెట్టింది!
- IndiaGlitz, [Tuesday,June 27 2017]
మహేష్, కొరటాల శివ కాంబినేషన్‌లో వచ్చిన 'శ్రీమంతుడు' ఎంతటి విజయాన్ని సాధించిందో అందరికీ తెలిసిందే. మళ్ళీ అదే కాంబినేషన్‌లో సినిమా వస్తోందంటే దానిపై ప్రేక్షకుల్లో, అభిమానుల్లో భారీ అంచనాలే వుంటాయి. వారి అంచనాలను అందుకునే స్థాయిలోనే ఈ హిట్‌ కాంబినేషన్‌లో మరో సినిమా వస్తోంది. ఈ చిత్రానికి 'భరత్‌ అనే నేను టైటిల్‌ పరిశీలనలో వుంది. ఈ సినిమాలో మహేష్‌తో జత కట్టే హీరోయిన్‌ ఎవరు అనే విషయంలో చాలా ఊహాగానాలు వినిపించాయి. చివరికి ఆ అవకాశం కైరా అద్వానికి వచ్చింది.
ఎం.ఎస్‌.ధోని చిత్రంలో నటించిన కైరా అద్వాని మరో రెండు హిందీ సినిమాలు కూడా చేసింది. ఈ భామ మహేష్‌తో రొమాన్స్‌ మొదలు పెట్టింది. మహేష్, కైరా అద్వానిల మధ్య వచ్చే కొన్ని సన్నివేశాల చిత్రీకరణ మంగళవారం మొదలుపెట్టారు. మహేష్ పక్కన హీరోయిన్‌గా నటించడం ఎంతో ఎక్సైటింగ్‌గా ఫీల్‌ అవుతున్నానని కైరా చెప్తోంది. డి.వి.వి. ఎంటర్‌టైన్‌మెంట్స్‌ బేనర్‌లో డి.వి.వి. దానయ్య నిర్మిస్తున్న ఈ చిత్రానికి దేవిశ్రీప్రసాద్‌ సంగీతాన్ని అందిస్తున్నారు.