காங்கிரஸ் கட்சியின் தேசிய செய்தி தொடர்பாளராக இருந்து வரும் நடிகை குஷ்பு கடந்த சில நாட்களாக பாஜகவில் இணைய இருப்பதாக வதந்திகள் பரவியது. மத்திய அரசின் புதிய கல்விக் கொள்கையை ஆதரித்து அவர் டுவிட் செய்ததும், மத்திய உள்துறை அமைச்சர் அமித்ஷா, கொரோனாவால் பாதிக்கப்பட்ட போது அவர் விரைவில் குணமாக வாழ்த்து தெரிவித்ததும் இந்த வதந்திகளுக்கு காரணமாக இருந்தது

இந்த நிலையில் சமீபத்தில் சென்னையில் காங்கிரஸ் சார்பில் நடந்த ஆர்ப்பாட்டத்தில் கலந்து கொண்ட குஷ்பு, தான் பாஜகவில் இணைய போவதாக வெளிவந்து கொண்டிருக்கும் தகவல்கள் அனைத்தும் வதந்தி என மீண்டும் மறுப்பு தெரிவித்தார்.

இந்த நிலையில் காங்கிரஸ் செய்திதொடர்பாளரும் நடிகையுமான குஷ்பு, நாளை பாஜகவில் இணையவிருப்பதாகவும், டெல்லியில் பாஜக தேசிய தலைவர் ஜே.பி. நட்டா முன்னிலையில், அவர் இணைவதற்காக இன்று அவர் அவசரமாக டெல்லி புறப்படுகிறார் என்றும் தகவல்கள் வெளிவந்துள்ளன. இதனால் தமிழக அரசியல் உலகில் பெரும் பரபரப்பு ஏற்பட்டுள்ளது