கொரோனா நோய்த்தொற்றின் இரண்டாம் அலை காரணமாக குறித்த நேரத்தில் எந்த திரைப்படங்களும் வெளிவரவில்லை. இந்நிலையில் ரசிகர்கள் மத்தியில் பெரும் எதிர்பார்ப்பை ஏற்படுத்தி இருக்கும் “கேஜிஎஃப் 2“ திரைப்படம் வரும் செப்டம்பர் மாதம் திரையரங்கில் வெளியிடப்படும் எனப் படக்குழு அறிவித்து இருக்கிறது.

இயக்குநர் பிரசாந்த் நீல் இயக்கத்தில் கடந்த 2018 ஆம் ஆண்டு வெளியான திரைப்படம் “கேஜிஎஃப்“. இந்தப் படம் இந்தியா முழுக்கவே பலத்த வரவேற்பை பெற்றது. இதில் நடிகர் யஷ் நடித்து இருந்தார். அவரோடு ஸ்ரீநிதி ஷெட்டி, சஞ்சய் தத், பிரகாஷ் ராஜ், ரவீனா டாண்டன் எனப் பல முக்கிய நடிகர்களும் நடித்து இருந்தனர். இந்நிலையில் சமீபத்தில் கேஜிஎஃப் 2 படத்தின் டீசர் வெளியாகி ரசிகர்களிடையே பெரும் வரவேற்பை பெற்றது.

மேலும் இந்தப் படம் வரும் ஜுலை 16 ஆம் தேதி திரையரங்கிற்கு வரும் எனப் படக்குழு அறிவித்து இருந்த நிலையில் இந்தப் படத்தின் வெளியீட்டுத் தேதியை தற்போது தள்ளி வைப்பதாக அறிவிப்பு வெளியாகி இருக்கிறது. கொரோனா இரண்டாவது அலை காரணமாக பல மாநிலங்களில் தியேட்டர்கள் மூடப்பட்டு உள்ளன. இதனால் இரண்டாம் அலை முழுவதும் ஓய்ந்த பிறகு வரும் செப்டம்பர் மாதம் 9 ஆம் தேதி திரையங்கில் “கேஜிஎஃப்2“ திரைப்படம் வெளியிடப்படும் எனக் கூறப்பட்டு உள்ளது.