‘మహానటి’తో జాతీయ అవార్డుని దక్కించుకున్న కీర్తిసురేశ్ నటించిన లేటెస్ట్ మూవీ ‘పెంగ్విన్’. కార్తీక్ సుబ్బరాజ్ నిర్మాణంలో ఈశ్వర్ కార్తిక్ దర్శకత్వంలో సినిమా తెరకెక్కింది. కరోనా ప్రభావంతో థియేటర్స్ ఇంకా ఓప‌న్ కాలేదు. ఈ నేప‌థ్యంలో పెంగ్విన్ చిత్రాన్ని ప్ర‌ముఖ డిజిట‌ల్ సంస్థ అమెజాన్ ప్రైమ్ ద్వారా విడుద‌ల చేస్తున్నారు. ఈ జూన్ 19 నుండి సినిమా ఓటీటీలో ప్ర‌ద‌ర్శితం కానుంది. తాజాగా ఈ సినిమా ట్రైల‌ర్‌ను వివిధ భాషల‌కు చెందిన ముగ్గురు స్టార్ హీరోలు విడుద‌ల చేయ‌డం విశేషం. మ‌ల‌యాళ ట్రైల‌ర్‌ను మ‌ల‌యాళ సూప‌ర్‌స్టార్ మోహ‌న్‌లాల్ విడుద‌ల చేయ‌గా... త‌మిళ ట్రైల‌ర్‌ను హీరో ధ‌నుష్‌.. తెలుగు ట్రైల‌ర్‌ను నేచుర‌ల్ స్టార్ నాని విడుద‌ల చేశారు.

హీరోయిన్ కీర్తిసురేశ్ ఇందులో త‌ల్లిపాత్ర‌లో న‌టించారు. ఈమె పిల్లాడిని ఓ సైకో కిడ్నాప్ చేస్తాడు. ఆ పిల్లాడిని వెతికి ప‌ట్టుకోవ‌డానికి ఓ అడ‌విలో ఆమె ఏం చేసింది? పోలీసులు ఆమెకు ఎలా సాయ‌ప‌డ్డారు? అనే అంశాల‌తో సినిమా తెర‌కెక్కింద‌ని ట్రైల‌ర్ చూస్తేనే అర్థ‌మ‌వుతుంది. మ‌హాన‌టి త‌ర్వాత కీర్తిసురేశ్ ప్ర‌ధాన పాత్ర‌లో న‌టించిన చిత్ర‌మిది. అది కూడా ఓటీటీలో విడుద‌ల‌కానుండ‌టం విశేషం. మ‌రి ప్రేక్ష‌కుల‌ను ఈ సినిమా ఏ మేర‌కు మెప్పిస్తుందో తెలియాలంటే జూన్ 19 వ‌ర‌కు ఆగాల్సిందే.