`మ‌హాన‌టి`తో జాతీయ ఉత్త‌మ‌న‌టిగా అవార్డును సొంతం చేసుకున్న కీర్తి సురేశ్ ఇప్పుడు సినిమాల ఎంపిక‌లో అచితూచి వ్య‌వ‌హ‌రిస్తుంది. ఒకట్రెండు క‌మ‌ర్షియ‌ల్ సినిమాల్లో న‌టించినప్ప‌టికీ ఎక్కువ ఉమెన్ ఓరియెంటెడ్ సినిమాల్లో న‌టించ‌డానికి ఆస‌క్తిని చూపుతుంది. అందుకు త‌గిన‌ట్లు ఇప్పుడు కీర్తి సురేశ్ చేతిలో మూడు ఉమెన్ ఓరియెంటెడ్ సినిమాలున్నాయి. అలాగే బాలీవుడ్ సినిమాల్లోనూ కీర్తి సురేశ్ న‌టిస్తుంది. ఇక ద‌క్షిణాది సినిమాల విషయానికి వ‌స్తే.. తెలుగులో న‌గేశ్ కుకునూర్ ద‌ర్శ‌క‌త్వంలో కీర్తి ఓ సినిమా చేస్తోన్న సంగ‌తి తెలిసిందే. ఇది స్పోర్ట్స్ బ్యాక్‌డ్రాప్ మూవీ. ఈ చిత్రానికి `గుడ్‌ల‌క్ స‌ఖి` అనే టైటిల్‌ను ఖ‌రారు చేసిన‌ట్లు చిత్ర యూనిట్ తెలియ‌జేసింది.

ఈ చిత్రంలో కీర్తి రైఫిల్ షూట‌ర్ పాత్ర‌లో క‌న‌ప‌డ‌నుంద‌ట‌. గ్రామం నుండి వ‌చ్చిన ఓ యువ‌తి 10 మీట‌ర్స్ రైఫిల్ షూటింగ్ విభాగంలో త‌న ప్ర‌తిభ‌ను ఎలా నిరూపించుకుంద‌నేదే క‌థ‌. ఈ చిత్రంలో జ‌గ‌ప‌తిబాబు కోచ్ పాత్ర‌లో క‌న‌ప‌డ‌తాడ‌ట‌. కానీ ఆది పినిశెట్టి ఓ కీల‌క పాత్ర‌లో న‌టిస్తున్నాడ‌ట‌. ఇప్ప‌టికే 75 శాతం చిత్రీక‌ర‌ణ పూర్త‌య్యింద‌ట‌. త‌ను వెడ్స్ మ‌ను చిరంత‌న్ దాస్ ఈ చిత్రానికి కెమెరామెన్‌గా ప‌నిచేస్తున్నాడ‌ట‌. న‌వంబ‌ర్ 1 నుండి ఫైన‌ల్ షెడ్యూల్ షూట్ చేయ‌నున్నారు. సుధీర్ చంద్ర‌, శ్రావ్య వ‌ర్మ సినిమాను నిర్మిస్తున్నారు.