எஸ்.எஸ்.ராஜமெளலியின் அடுத்த படத்தில் விஜய் பட நாயகி
- IndiaGlitz, [Saturday,June 30 2018]
'பாகுபலி' , 'பாகுபலி 2' படங்களின் உலகளாவிய வெற்றிக்கு பின்னர் இயக்குனர் எஸ்.எஸ்.ராஜமெளலி தற்போது ராம்சரண்தேஜா மற்றும் ஜூனியர் என்.டி.ஆர் ஆகிய இருவரும் இணைந்து நடிக்கும் படத்தை இயக்கி வருகிறார். இந்த படத்திற்கு 'ஆர் ஆர் ஆர்' என்ற டைட்டில் இப்போதைக்கு வைக்கப்பட்டுள்ளது. ராஜமெளலி, ராம்சரண், ராமராவ் ஆகியவைகளின் முதல் எழுத்துதான் இந்த படத்தின் டைட்டில் என்று கூறப்படுகிறது.
இந்த நிலையில் இந்த படத்தில் இரண்டு முன்னணி நாயகிகள் நடிக்கவுள்ளதாகவும் அவர்களது தேர்வு நடைபெற்று வருவதாகவும் கடந்த சில நாட்களாக தெலுங்கு திரையுலகில் செய்திகள் வெளிவந்து கொண்டிருந்தன. தற்போது கிடைத்திருக்கும் தகவலின்படி இந்த படத்தின் ஒரு நாயகியாக கீர்த்திசுரேஷிடம் பேச்சுவார்த்தை நடத்தப்பட்டு வருவதாகவும் மிகவிரைவில் இதுகுறித்த அறிவிப்பு வெளியாகும் என்றும் கூறப்படுகிறது.
கீர்த்திசுரேஷ் நடிப்பில் சமீபத்தில் வெளிவந்த 'நடிகையர் திலகம்' படத்திற்கு முதன்முதலில் பாராட்டு தெரிவித்தவர் எஸ்.எஸ்.ராஜமெளலி என்பதும் இந்த படத்தில் அவருடைய நடிப்பு பெரிதும் கவர்ந்ததால் அவருடைய படத்தின் நாயகியாகியுள்ளார் என்பதும் குறிப்பிடத்தக்கது.
கீர்த்திசுரேஷ் தற்போது விஜய் நடித்து வரும் 'சர்கார்', விஷால் நடித்து வரும் 'சண்டக்கோழி 2' , விக்ரம் நடித்து வரும் 'சாமி 2' ஆகிய படங்களில் நடித்து வருகிறார் என்பது குறிப்பிடத்தக்கது.