చిరంజీవి సినిమాలో కీర్తి సురేష్.. ఏ పాత్రలోనంటే ?
- IndiaGlitz, [Wednesday,October 28 2020]
మెగాస్టార్ చిరంజీవి అప్‌కమింగ్ మూవీలో హీరోయిన్ కీర్తి సురేష్ ఛాన్స్ కొట్టేసింది. చిరు హీరోగా తమిళ్ బ్లాక్ బస్టర్ ‘వేదాళం’ను డైరెక్టర్ మెహర్ రమేష్ రీమేక్ చేయనున్న విషయం తెలిసిందే. ఈ సినిమా త్వరలోనే పట్టాలెక్కనుంది. ఈ క్రమంలోనే ప్రస్తుతం డైరెక్టర్ మెహర్ రమేష్ నటీనటుల ఎంపిక ప్రక్రియను పూర్తి చేస్తున్నారు. ఈ సినిమాలో సోదరి పాత్ర అత్యంత కీలకం కానుంది. దీని కోసం మెహర్ రమేష్ కీర్తి సురేష్‌ను ఎంచుకున్నట్టు సమాచారం.
మంచి నటనకు స్కోప్‌తో పాటు చిత్రానికి కీలక పాత్ర కావడంతో చిత్రబృందం కీర్తిని ఈ పాత్ర కోసం ఎంపిక చేసుకున్నట్టు తెలుస్తోంది. అంతే కాదు.. ఈ పాత్ర కోసం కీర్తి పేరును స్వయంగా మెగాస్టారే ఎంపిక చేసినట్టు తెలుస్తోంది. ఈ సినిమాకు కీర్తి కూడా ఓకే చెప్పినట్టు సమాచారం. త్వరలోనే అగ్రిమెంట్‌పై కీర్తి సైన్ చేయనున్నట్టు తెలుస్తోంది. ‘మహానటి’ తర్వాత కీర్తికి తెలుగులో ఆఫర్స్ బాగా తగ్గిపోయాయి.
ఇప్పుడిప్పుడే తిరిగి బిజీ అవుతోంది. ‘సర్కారు వారి పాట’లో సూపర్ స్టార్ మహేష్‌బాబు సరసన కీర్తి నటిస్తోంది. కాగా ‘వేదాళం’ రీమేక్‌కు అనిల్ సుంకర నిర్మాతగా వ్యవహరించనున్నట్టు సమాచారం. త్వరలోనే ఈ సినిమాకు సంబంధించిన అధికారిక సమాచారం వెలువడనున్నట్టు తెలుస్తోంది.