కీర్తి సురేష్ హ్యాట్రిక్
- IndiaGlitz, [Thursday,May 17 2018]
‘నేను శైలజ’ సినిమాతో తెలుగు తెర‌కు కథానాయికగా పరిచయమైన కేర‌ళ కుట్టి కీర్తి సురేష్. తొలి సినిమాతోనే తెలుగు ప్రేక్షకులకి దగ్గరవడమే కాకుండా.. మంచి విజయాన్ని కూడా తన ఖాతాలో వేసుకుంది. తన రెండో చిత్రం ‘నేను లోకల్’తో మ‌రో విజయాన్ని తన ఖాతాలో వేసుకోవ‌డ‌మే కాకుండా.. తొలిసారి ఓవర్సీస్‌లో వన్ మిలియన్ డాలర్ క్లబ్‌లో స్థానం సంపాదించింది.
తాజాగా.. న‌టీమ‌ణి సావిత్రి బయోపిక్‌గా తెరకెక్కిన ‘మహానటి’లో ప్రధాన పాత్ర పోషించి.. న‌టిగా మంచి మార్కులు తెచ్చుకుంది. ఈ సినిమాలో సావిత్రి పాత్రకు ఈమె ప్రాణం పోసిందని పలువురు కొనియాడుతున్న విషయం తెలిసిందే. ఈమె నటించిన ఈ చిత్రం తెలుగు రాష్ట్రాల్లోనే కాకుండా ఓవర్సీస్‌లో కూడా కాసుల వర్షం కురిపిస్తోంది. ఓవర్సీస్‌లో విడుదలైన 8 రోజుల్లోనే 2 మిలియన్ డాలర్ వసూళ్లను రాబట్టిందీ సినిమా. కీర్తి గ‌త చిత్రం ‘అజ్ఞాతవాసి’ ఫ‌లితం ఎలా ఉన్నా $2.07 మిలియ‌న్లు రాబ‌ట్ట‌గా.. ప్రస్తుతం ‘మహానటి’ $2.0 మిలియన్ వసూళ్లను రాబట్టి మరిన్ని కలెక్షన్లు రాబ‌ట్టే దిశ‌గా పరుగులు తీస్తోంది.
ఇలా.. కీర్తి ఈ ఏడాది బ్యాక్ టు బ్యాక్ 2 మిలియన్ డాలర్ వసూళ్లను రాబట్టిన సినిమాల్లో నటించడం విశేషమని చెప్పుకోవచ్చు. అలాగే.. తెలుగులో ఈమె నటించిన నాలుగు సినిమాల్లో మూడు సినిమాలు వ‌రుస‌గా మిలియన్ డాలర్ క్లబ్‌లో స్థానం సంపాదించడం కూడా ప్రత్యేకమే.