హీరోయిన్లు అన్నాక ఇంటిప‌ట్టున ఉండ‌టం చాలా అరుదు. ఎప్పుడూ పెట్టేబేడా స‌ర్దుకుని ఏదో ఒక ఊరుకు షూటింగ్ కోసం ప్ర‌యాణం అవుతూ ఉండాల్సిందే. అయితే ఈ హాట్ స‌మ్మ‌ర్‌లో కీర్తి సురేష్ నేరుగా యూరోప్ వెళ్తున్నారు. అదీ వారమో, ప‌ది రోజులో ఉండ‌టానికి కాదు. ఏకంగా 45 రోజులు ఉంటారామె. మ‌హేష్ కోనేరు నిర్మాణంలో కీర్తి సురేష్ హీరోయిన్‌గా న‌టిస్తున్న సంగతి తెలిసిందే. మ‌రికొన్ని వారాల్లోనే ఈ సినిమా షూటింగ్ యూరోప్‌లో జ‌ర‌గ‌నుంది.

అక్క‌డ షెడ్యూల్ మొద‌లుకాగానే, ఇందులో న‌టించ‌బోయే మ‌రికొంత మంది పెద్ద పెద్ద ఆర్టిస్టుల పేర్ల‌ను కూడా ప్ర‌క‌టించ‌నున్న‌ట్టు మ‌హేష్ చెప్పారు. న‌రేంద్ర‌నాథ్ ద‌ర్శ‌క‌త్వం వ‌హిస్తున్న చిత్ర‌మిది. ఇటీవ‌ల క‌ల్యాణ్‌రామ్, నివేదా థామ‌స్ న‌టించిన `118` చిత్రంతో హిట్ కొట్టిన ఆనందంతో ఉన్నారు మ‌హేష్‌. ఈ చిత్రంతో ఆ విజ‌యాన్ని కొన‌సాగించాల‌ని అభిల‌షిస్తున్నారు. అందుకే కీర్తి సురేష్ న‌టించే చిత్రంలోని న‌టీన‌టుల‌ను, సాంకేతిక నిపుణుల‌ను జాగ్ర‌త్త‌గా ఎంపిక చేసుకుంటున్నారు. న‌రేష్‌, రాజేంద్ర‌ప్ర‌సాద్‌, న‌దియా, భానుశ్రీ మెహ‌రా, క‌మ‌ల్ కామ‌రాజు త‌దిత‌రులు ఈ తాజా చిత్రం కోసం ఇప్ప‌టికే సైన్ చేశారు.