లెజెండరీ యాక్ట్రెస్ సావిత్రి బయోపిక్ గా రూపొందుతున్న చిత్రం 'మహానటి'. సావిత్రి పాత్రలో కీర్తి సురేష్ నటిస్తున్న సంగతి తెలిసిందే. నాగ అశ్విన్ డైరెక్షన్లో తెరకెక్కుతున్న ఈ మూవీలో మోహన్ బాబు (ఎస్.వి.ఆర్), దుల్కర్ సల్మాన్ (జెమినీ గణేషన్), డైరెక్టర్ క్రిష్ (కె.వి.రెడ్డి), డైరెక్టర్ తరుణ్ భాస్కర్ (సింగీతం శ్రీనివాస రావు) ముఖ్య పాత్రలు పోషిస్తున్నారు. అలాగే సమంత, విజయ్ దేవరకొండ, షాలిని పాండే కీలక పాత్రల్లో కనిపించనున్నారు. ఇప్ప‌టికే చిత్ర నిర్మాతలు ఆసక్తిని పెంచడానికి కొన్ని పాత్రలను రివీల్‌ చేసారు.

అయితే.. సావిత్రి జీవితానికి సంబంధించి ముఖ్యమైన పాత్రల విషయంలో మాత్రం చాలా జాగ్రత్తలు తీసుకుంటున్నారు. అలాగే వాటిని గోప్యంగా కూడా ఉంచుతున్నారు. సావిత్రితో అత్యంత సన్నిహితంగా, చేదోడువాదోడుగా మెలిగిన ఆమె స్నేహితురాలు, స‌హ‌న‌టి జమున అని అందరికి తెలిసిన విషయమే.

ఈ ఇద్దరు మేటి నటీమణులు చాలా సినిమాల్లో కలిసి నటించారు కూడా. అయితే ఇప్పుడు ఈ విషయమై ఈ మూవీలో లీడ్ రోల్ పోషిస్తున్న కీర్తి సురేష్ ఒక ఆసక్తికరమైన విషయాన్ని చెప్పారు. జమున పాత్రలో సమంత కనిపించబోతున్నట్లు ఆమె బహిర్గతం చేసార‌ని మీడియా వ‌ర్గాలు పేర్కొంటున్నాయి. ఇది యాదృచ్ఛికంగా జరిగిందా లేదా చిత్ర యూనిట్ కావాలని చెప్పించారో మరి కొద్ది రోజుల్లో తెలుస్తుంది.