కీర్తి ఎక్కువ సార్లు చూసిన సినిమా అదేనట
- IndiaGlitz, [Saturday,January 06 2018]
టాలీవుడ్, కోలీవుడ్ లో వరుస సినిమాలతో టాప్ హీరోయిన్ రేసులో దూసుకుపోతున్న కథానాయిక కీర్తి సురేష్. ఈ సంక్రాంతికి విడుదల కానున్న అజ్ఞాతవాసి', గ్యాంగ్' సినిమాలతో.. థియేటర్లలో సందడి చేయడానికి ఈ ముద్దుగుమ్మ సిద్ధ‌మ‌వుతున్నారు.
ఇటీవల ఒక మీడియాకి ఇచ్చిన ఇంటర్వ్యూలో సూర్య గురించి కీర్తి మాట్లాడుతూ, “గజని' సినిమాలో సంజయ్ రామస్వామి పాత్రలో సూర్య స‌ర్‌ని చూసి చాలా భయమేసింది, కాని గ్యాంగ్' సినిమాలో కలిసి నటించాక అదొక మరచిపోలేని అనుభూతిగా ఉంది” అని వెల్లడించారు. మరో అగ్ర క‌థానాయ‌కుడు విక్ర‌మ్ గురించి మాట్లాడుతూ “నేను చియాన్ విక్రమ్‌కి చాలా పెద్ద ఫ్యాన్. ఆయన నటించిన అప‌రిచితుడు' సినిమా మూడు సార్లు చూసాను. థియేటర్లో అన్ని సార్లు చూసిన మూవీ అదే. ఇప్పుడు ఆయనతో కలిసి సామి స్క్వేర్' లో నటిస్తున్నందుకు ఆనందంగా ఉంది” అంటూ చెప్పుకొచ్చారు. ఈమె నటించిన అజ్ఞాతవాసి' ఈ నెల 10న విడుదల కానుండగా...సూర్యతో కలిసి నటించిన గ్యాంగ్' 12వ తేదీన రిలీజ్ కాబోతున్న విషయం తెలిసిందే.