ఆర్టీసీ ఉద్యోగులకు సీఎం కేసీఆర్ శుభవార్త చెప్పారు. కరోనా కాలంలో ఆర్టీసీ ఉద్యోగులకు 50 శాతం వేతనాన్ని మాత్రమే చెల్లించారు. ఇలా రెండు నెలల పాటు సగం జీతాన్ని మాత్రమే ప్రభుత్వం చెల్లించింది. ఆదివారం ఆర్టీసీపై ఉన్నతాధికారులతో సీఎం కేసీఆర్ సమీక్ష నిర్వహించారు. ఈ సమావేశంలో ఉద్యోగుల భద్రతపై చర్చించిన కేసీఆర్.. త్వరలో విధానపరమైన నిర్ణయం తీసుకోబోతున్నట్టు వెల్లడించారు. ఈ నేపత్యంలో కోవిడ్ కారణంగా ఆర్టీసీ ఉద్యోగుల జీతంలో కోత విధించిన సగం జీతాన్ని తిరిగి చెల్లించాలని కేసీఆర్ నిర్ణయించారు.

ఈ క్రమంలోనే ఆర్టీసీ ఉద్యోగుల 50 శాతం వేతనాన్ని తిరిగి చెల్లించేందుకు దాదాపు రూ. 120 నుంచి రూ. 130 కోట్లను విడుదల చేయాలని ఆర్థికశాఖకు ఆదేశాలు జారీ చేశారు. కాగా... పార్సిల్ సర్వీసుల బిజినెస్ 1 మిలియన్ దాటింది. ఈ నేపథ్యంలో కేసీఆర్.. ఆర్టీసీ అధికారులను అభినందించారు. అలాగే సోమవారం నుంచి గ్రేటర్ హైదరాబాద్ పరిధిలో 50 శాతం బస్సులను పురనరుద్దరించాలని ఆర్టీసీ ఎండీ సునీల్ కుమార్‌ను సీఎం కేసీఆర్ ఆదేశించారు.

కాగా.. కరోనా లాక్‌డౌన్ కారణంగా మార్చిలో గ్రేటర్ పరిధిలోని బస్సులు సైతం నిలిచాయి. ఇటీవల అన్‌లాక్ ప్రక్రియలో భాగంగా 25 శాతం బస్సులను పునరుద్ధరించారు. పరిస్థితులు అనుకూలిస్తే గ్రాడ్యువల్‌గా బస్సులను తిప్పాలని ప్రభుత్వం భావించింది. ఇటీవల తిరుగుతున్న బస్సుల కారణంగా ఎలాంటి కోవిడ్ పరమైన ఇబ్బందులూ తలెత్తకపోవడంతో నగర వాసుల అవసరం దృష్ట్యా 50 శాతం బస్సు సర్వీసులను పునరుద్ధరించాలని ఆర్టీసీ ఎండీని సీఎం ఆదేశించారు. దీంతో రేపటి నుంచి గ్రేటర్‌లో 50 శాతం బస్సులు రోడ్డెక్కనున్నాయి.