తెలంగాణ రాష్ట్ర ఐటీ శాఖ మంత్రి కె.తార‌క రామారావు ఈరోజు బిగ్ న్యూస్ చెబుతాను అన్నారు. అయితే...కె.టి.ఆర్ చెప్పే బిగ్ న్యూస్ ఏమిటా అని ఆస‌క్తిగా ఎదురు చూసారు. ఇంత‌కీ కెటిఆర్ చెప్పాల‌నుకున్న బిగ్ న్యూస్ ఏమిటంటే... యాపిల్ కంపెనీ సీఈవో టిమ్ కుక్ ఈరోజు హైద‌రాబాద్ చేరుకున్నారు. ముంబై నుంచి ప్ర‌త్యేక విమానంలో కుక్ హైద‌రాబాద్ శంషాబాద్ కు చేరుకున్నారు. అక్క‌డ నుంచి నాన‌క్ రామ్ గూడ‌లోని వేవ్ రాక్ బిల్డింగ్ లో ఏర్పాటు చేసిన ఆపిల్ కార్యాల‌యంలోని డిజిట‌ల్ మాపింగ్ కేంద్రాన్ని ప్రారంభించారు. దీని ద్వారా సుమారు నాలుగు వేల మందికి ఉపాధి ల‌భిస్తుంద‌ట‌.ఇదే కెటిఆర్ చెప్పాల‌నుకున్న బిగ్ న్యూస్.

ఇదిలా ఉంటే...గ‌త కొన్ని రోజులుగా కె.టి.ఆర్ గురువారం బిగ్ న్యూస్ చెబుతాను అప్ప‌టి వ‌ర‌కు స‌స్పెన్స్ అన్నారు. ఏమిటా బిగ్ న్యూస్ అంటూ చాలా మంది చాలా ర‌కాలుగా ఊహించుకున్నారు. కొంత మంది అయితే స‌ర‌దాగా....బాహుబ‌లిని క‌ట్ట‌ప్ప ఎందుకు చంపారో చెబుతారా అన్నారు కూడా. దీనికి స‌మాధానంగా కొద్దిసేప‌టి క్రితం కె.టి.ఆర్ ట్విట్ట‌ర్ లో...బాహుబ‌లిని క‌ట్ట‌ప్ప ఎందుకు చంపాడో నాకు తెలియ‌దు..స‌మాధానం కావాలంటే నా ఫ్రెండ్ రానా ద‌గ్గుబాటిని అడ‌గండి అంటూ స‌ర‌దాగా స్పందించారు. బాహుబ‌లి ఆ సినిమాలో న‌టించిన వాళ్ల‌ను..సినీ ప్ర‌ముఖులనే కాకుండా..రాజ‌కీయ నాయ‌కులను సైతం వ‌ద‌లడం లేదంటే...ఎంత‌టి సంచ‌ల‌నం సృష్టించిందో అర్ధం చేసుకోవ‌చ్చు.