திமுக தலைவர் கருணாநிதி நேற்று முன் தினம் மாலை 6.10 மணிக்கு கோடிக்கணக்கான தமிழ் நெஞ்சங்களை தவிக்கவிட்டு மரணம் அடைந்தார். அன்னாரது உடல் நேற்று முழு அரசு மரியாதையுடன் நல்லடக்கம் செய்யப்பட்டது. நேற்றிரவு முதல் இப்போதுவரை மெரீனாவில் அமைந்துள்ள அவரது சமாதிக்கு கூட்டம் கூட்டமாக தொண்டர்கள் அவருக்கு கண்ணீர் அஞ்சலி செலுத்தி வருகின்றனர்.

இந்த நிலையில் கருணாநிதியின் இறப்பை சென்னை மாநகராட்சி தற்போது பதிவு செய்து இறப்பு சான்றிதழையும் வழங்கியுள்ளது. இறப்பு சான்றிதழில் கருணாநிதியின் வயது 94 என்றும், மரணம் அடைந்த இடம் காவேரி மருத்துவமனை என்றும், அவரது தாயார் பெயர் அஞ்சுகம் என்றும், தாந்தையார் பெயர் முத்துவேல் என்றும், மனைவி பெயர் தயாளு கருணாநிதி என்றும் குறிப்பிடப்பட்டுள்ளது.

மேலும் கருணாநிதியின் நிரந்தர முகவரியாக அவரது கோபாலபுர வீட்டின் முகவரி அவருடைய இறப்பு சான்றிதழில் குறிப்பிடப்பட்டுள்ளது.