திமுக தலைவர் கருணாநிதி இன்று மாலை தமிழக மக்களை துயரத்தில் ஆழ்த்திவிட்டு காலமானதை அடுத்து தமிழக மக்கள் பெரும் சோகத்தில் மூழ்கியுள்ளனர். அவரது முகத்தை கடைசியாக ஒருமுறை பார்க்க தமிழகத்தின் பல்வேறு பகுதிகளில் இருந்து சென்னையை நோக்கி திமுக தொண்டர்கள் வந்தவண்ணம் உள்ளனர்.

இந்த நிலையில் திமுக தலைவரின் உடல் குடும்ப உறுப்பினர்களின் அஞ்சலிக்காகவும், தலைவர்கள் அஞ்சலி செலுத்தவும் எங்கெங்கு எவ்வளவு நேரம் வைக்கப்படும் என்பது குறித்த தகவல் தற்போது வெளிவந்துள்ளது

இதன்படி திமுக தலைவர் கருணாநிதியின் உடல் கோபாலபுரம் இல்லத்தில் இன்று இரவு 8.30 மணி முதல் நள்ளிரவு 1 மணி வரையும், சிஐடி காலனி இல்லத்தில் அதிகாலை 3 மணி வரையும் இருக்கும் என்றும், அந்த சமயத்தில் அவரது குடும்பத்தினர், உறவினர்கள் இறுதி மரியாதை செலுத்த ஏற்பாடு செய்யப்பட்டிருப்பதாக அறிவிக்கப்பட்டுள்ளது.

இதனையடுத்து திமுக தலைவர் கருணாநிதியின் உடலுக்கு அரசியல் கட்சித் தலைவர்கள், பொதுமக்கள் நாளை அதிகாலை 4 மணி முதல் ராஜாஜி ஹாலில் இறுதி மரியாதை செலுத்த ஏற்பாடு செய்யப்பட்டிருப்பதாக திமுக தலைமை அறிவித்துள்ளது.