நீட் தேர்வு குறித்து பொது விவாதத்திற்கு தயாரா? சூர்யாவுக்கு பாஜக அழைப்பு!
- IndiaGlitz, [Monday,July 05 2021]
நீட் தேர்வு குறித்து பொது வெளியில் பொது விவாதம் நடத்த நடிகர் சூர்யா தயாரா? என பாஜக பொதுச்செயலாளர் கேள்வி எழுப்பியுள்ளது பரபரப்பை ஏற்படுத்தி உள்ளது.
நடிகர் சூர்யா கடந்த சில மாதங்களுக்கு முன்னர் நீட்தேர்வுக்கு எதிராக ஆவேசமான அறிக்கை ஒன்றை வெளியிட்டார். இந்த அறிக்கை பெரும் பரபரப்பை ஏற்படுத்தியது என்பது குறிப்பிடத்தக்கது.
இந்த நிலையில் நீட் தேர்வின் தாக்கம் குறித்து ஆய்வு செய்யும் ஏகே ராஜன் குழுவுக்கு எதிராக வழக்கு தொடுத்துள்ள பாஜக பொதுச்செயலாளர் கரு நாகராஜன் அவர்கள் செய்தியாளர்களை சந்தித்தார். அப்போது நீட் தேர்வை காங்கிரஸ் மற்றும் கம்யூனிஸ்ட் கட்சிகள் ஆளும் மாநிலங்களில் அந்த கட்சிகள் நீட் தேர்வை எதிர்க்கவில்லை என்றும் தமிழகத்தில் மட்டும்தான் எதிர்க்கின்றன என்றும் தெரிவித்தார். நீட்தேர்வு தாக்கம் குறித்து ஆய்வு குழுவுக்கு எதிராக பதிவு செய்யப்பட்டுள்ள வழக்கு சட்ட போராட்டம் என்றும் அவர் தெரிவித்துள்ளார்.
மேலும் நீட் தேர்வுக்கு எதிராக கருத்து கூறி வரும் நடிகர் சூர்யா பொது விவாதத்துக்கு தயாரா? என்றும் அவர் கேள்வி எழுப்பியுள்ளார். கரு நாகராஜன் அவர்களுடன் நீட் தேர்வு குறித்து நடிகர் சூர்யா பொது விவாதம் செய்வாரா? என்பதை பொறுத்திருந்து பார்ப்போம்.