'கபாலி' டீசரை எதிர்நோக்கும் கோலிவுட் நட்சத்திரங்கள்
- IndiaGlitz, [Saturday,April 30 2016]
சூப்பர் ஸ்டார் ரஜினிகாந்த் நடித்த 'கபாலி' படத்தின் டீசர் நாளை காலை 11 மணிக்கு யூடியூப் இணையதளத்தில் வெளியாகும் என தயாரிப்பாளர் கலைப்புலி எஸ்.தாணு அதிகாரபூர்வமாக அறிவித்ததை ஏற்கனவே பார்த்தோம். இந்நிலையில் ரஜினியின் கோடிக்கணக்கான ரசிகர்கள் மட்டுமின்றி கோலிவுட் திரையுலகின் முன்னணி நட்சத்திரங்களாகும் 'கபாலி'யின் டீசரை மிகுந்த ஆர்வத்துடன் எதிர்நோக்கியுள்ளனர் என்பது தெரியவந்துள்ளது.
முன்பெல்லாம் ரஜினியின் படங்கள் வெளியாகும் நாள்தான் திருவிழா போன்று இருக்கும் நிலையில் தற்போது ரஜினி படத்தின் டீசர் மற்றும் டிரைலர் வெளியாகும் நாளும் திருவிழாக் கோலமாக காட்சியளிக்கின்றது. குறிப்பாக தற்போதைய இண்டர்நெட் உலகில் நாளை பதினோரு மணிக்கு சமூக வலைத்தளங்கள் ரஜினி ரசிகர்களால் தெறிக்க வைக்கப்படும் என எதிர்பார்க்கப்படுகிறது.
இந்நிலையில் பிரபல இயக்குனரும் ரஜினியின் தீவிர ரசிகர்கருமான கார்த்திக் சுப்புராஜ் தனது சமூக வலைத்தளத்தில் 'என்னுடைய போன், டிவி, லேப்டாப் மற்றும் இணையம் சம்பந்தப்பட்ட அனைத்துமே நாளை முழுவதும் நான்ஸ்டாப்பாக 'கபாலி' டீசர்தான் ஒலிக்கும்' என்று கூறியுள்ளார்.
மேலும் நகைச்சுவை நடிகர் ரோபோ சங்கர் தன்னுடைய சமூக இணையதளத்தில், 'நாளை ஒரு முக்கிய படப்பிடிப்பை தலைவரின் 'கபாலி' டீசரை பார்க்க வேண்டும் என்பதற்காக கேன்சல் செய்துவிட்டேன்' என்று கூறியுள்ளார்.
இயக்குனர் பாலாஜி மோகன் கூறியதாவது: ஏதாவது வேலையோ அல்லது ஃபேஸ்புக், டுவிட்டரில் பதிவோ செய்வதாக இருந்தால் நாளை காலை 11மணிக்கு முன்னதாக செய்யவும், ஏனெனில் 11 மணிக்கு தலைவர் வருகிறார்' என்று பதிவு செய்துள்ளார்.