'துருவங்கள் 16' படத்தின் மூலம் கோலிவுட்டின் கவனத்தை தனது பக்கம் திருப்பியவர் 22 வயது இளைஞர் கார்த்திக் நரேன். இந்த படம் பெரிய புரமோஷன் இல்லாமல் சூப்பர் ஹிட் ஆகியது. இந்த நிலையில் கார்த்திக் நரேன் தற்போது அரவிந்தசாமி, ஸ்ரேயா, சந்தீப் உள்பட பலர் நடித்த 'நரகாசுரன்' என்ற படத்தை இயக்கி முடித்துள்ளார். கௌதம் மேனன் தயாரித்துள்ள இந்த படத்தின் ரிலீஸ் தேதி எந்த நேரமும் வெளிவர வாய்ப்புள்ளது.

இந்த நிலையில் கார்த்திக் நரேன் மூன்றாவது படத்தை இயக்க ஒப்பந்தம் செய்யப்பட்டுள்ளார். இந்த தகவலை அவர் தனது சமூக வலைத்தளத்தில் உறுதி செய்துள்ளார். இந்த படம் தனது முந்தைய இரண்டு படங்கள் போன்று த்ரில் படம் இல்லை என்றும் இதயத்தை வருடும் வித்தியாசமான திரைக்கதை என்றும் கார்த்திக் நரேன் தெரிவித்துள்ளார்.

மேலும் இந்த படத்தை தனது சொந்த நிறுவனமான நைட் நாஸ்டால்ஜியா ஃபிலிமோடெயின்மெண்ட் என்ற நிறுவனமும் இன்னொரு பிரபல நிறுவனமும் இணைந்து தயாரிக்கவுள்ளதாக பேட்டி ஒன்றில் தெரிவித்துள்ளார். இந்த படத்தில் நடிக்கும் நட்சத்திரங்கள் மற்றும் டைட்டில் உள்பட பிற விபரங்களுடன் கூடிய போஸ்டர் விரைவில் வெளியிடவுள்ளதாகவும் கார்த்திக் நரேன் தெரிவித்துள்ளார்.