'అభిమన్యుడు' ద‌ర్శ‌కుడితో కార్తి చిత్రం
- IndiaGlitz, [Sunday,May 20 2018]
విశాల్ స్వీయనిర్మాణంలో తెరకెక్కిన చిత్రం ‘ఇరుంబుతిరై’. ఈ చిత్రంతో పి.ఎస్.మిత్రన్ దర్శకుడిగా పరిచయమయ్యారు. సమంత కథానాయికగా నటించగా.. యాక్షన్ కింగ్ అర్జున్ ప్రతినాయకుడి పాత్రలో కనిపించారు. తమిళనాట ఈ నెల 11న విడుదలైన ఈ చిత్రం.. సూపర్ హిట్ టాక్‌తో సక్సెస్‌ఫుల్‌గా రన్ అవుతోంది. తొలి సినిమాతోనే తనలోని ప్రతిభను తెలియజేశారు దర్శకుడు మిత్రన్. కాగా.. ఈ సినిమాను తెలుగులో ‘అభిమన్యుడు’ పేరుతో ఈ నెల 31న విడుదల చేయనున్నారు. ఇప్పటికే ఈ సినిమాను చూసిన వాళ్ళంతా విశాల్‌ను, మిత్రన్‌ను అభినందిస్తుండగా.. ఆ జాబితాలోకి హీరో కార్తి కూడా చేరిపోయారు.
“‘ఇరుంబుతిరై’ సినిమాతో విశాల్.. నటుడిగా, నిర్మాతగా రెండు విజయాలను సొంతం చేసుకున్నారు, ఈ విజయాలకి విశాల్ అర్హుడు” అంటూ ట్విట్టర్ ద్వారా కార్తి ఇటీవ‌ల తన స్పందనను తెలియజేశారు. ఇదిలా ఉంటే.. కార్తి తదుపరి చిత్రాన్ని పి.ఎస్.మిత్రన్ దర్శకత్వం వహించనున్నార‌ని స‌మాచారం. ‘సింగం2’, ‘మోహిని’లాంటి చిత్రాల‌ను నిర్మించిన ప్రిన్స్ పిక్చర్స్ సంస్థ అధినేత ఎస్.లక్ష్మణ్ కుమార్ ఈ సినిమాని నిర్మించనున్నారు. త్వరలోనే దీనికి సంబంధించి మరిన్ని వివరాలు వెలువ‌డుతాయి. ప్రస్తుతం కార్తి, సయేషా సైగ‌ల్ జంటగా పాండిరాజ్ దర్శకత్వంలో ‘క‌డైకుట్టి సింగం’ (తెలుగులో ‘చినబాబు) రూపుదిద్దుకుంటున్న విషయం తెలిసిందే. త్వరలోనే ఈ సినిమా విడుదల కానుంది.