கார்த்தி நடிப்பில் கடந்த ஆண்டு வெளியான சூப்பர் ஹிட் படத்தின் இரண்டாம் பாகத்தின் பணிகள் தொடங்கி விட்டதாகவும் விரைவில் படப்பிடிப்பு தொடங்கும் என்றும் கூறப்படுகிறது.

கார்த்தி நடிப்பில் பிஎஸ் மித்ரன் இயக்கத்தில் ஜிவி பிரகாஷ் இசையில் உருவான திரைப்படம் ’சர்தார்’. கடந்த ஆண்டு அக்டோபர் மாதம் வெளியான இந்த திரைப்படம் மிகப்பெரிய வரவேற்பை பெற்றது என்பதும் ரூ.100 கோடிக்கும் அதிகமாக இந்த படம் வசூல் செய்ததாகவும் கூறப்பட்டது.

இந்த நிலையில் இந்த படத்தின் இறுதி காட்சியில் இரண்டாம் பாகத்திற்கான லீட் இருந்த நிலையில் தற்போது இரண்டாம் பாகத்திற்கான ஆரம்பகட்ட பணிகள் தொடங்கி விட்டதாக கூறப்படுகிறது.

‘சர்தார்’ படத்தை தயாரித்த பிரின்ஸ் பிக்சர்ஸ் நிறுவனம் தான் ’சர்தார் 2’ படத்தையும் தயாரிக்க இருப்பதாகவும் அதே போல் முதல் பாகத்தை இயக்கிய பிஎஸ் மித்ரன் இரண்டாம் பாகத்தை இயக்க இருப்பதாகவும் தெரிகிறது.

ஆனால் அதே நேரத்தில் ‘சர்தார்’ முதல் பாகத்தில் ஜிவி பிரகாஷ் இசையமைத்த நிலையில் தற்போது இரண்டாம் பாகத்தில் யுவன் சங்கர் ராஜா இசையமைக்க இருப்பதாகவும் கூறப்படுகிறது. இந்த படத்தின் அதிகாரப்பூர்வ அறிவிப்பு இன்னும் ஒரு சில நாட்களில் வெளியாகும் என்று கூறப்படுகிறது.

கார்த்தி தற்போது ’ஜப்பான்’ திரைப்படத்தில் நடித்து முடித்துள்ள நிலையில் நலன் குமாரசாமி இயக்கத்தில் உருவாகி வரும் திரைப்படத்தில் நடித்து வருகிறார். இந்த படத்தை அடுத்து அவர் ‘96’ இயக்குனர் பிரேம்குமார் இயக்கத்தில் ஒரு படத்தில் நடிக்க இருப்பதாகவும், அதன் பின்னர் தான் ‘சர்தார் 2’ படத்தில் நடிப்பார் என்று கூறப்படுகிறது. இந்த நிலையில் ‘கைதி 2’ படமும் மிக விரைவில் படப்பிடிப்பு தொடங்கும் என்று எதிர்பார்க்கப்படுகிறது.