சூர்யா நடிப்பில் சிறுத்தை சிவா இயக்கத்தில் உருவாகி வரும் ‘கங்குவா’ படத்தின் படப்பிடிப்பு கொடைக்கானலில் நடைபெற்று வருவதாக ஊடகங்களில் செய்திகள் வெளியாகி கொண்டிருக்கும் நிலையில் 'PS 2’ புரோமோஷன் விழாவில் கார்த்தி அதனை உறுதி செய்துள்ளார்.

மணிரத்னம் இயக்கத்தில் உருவான ‘பொன்னியின் செல்வன் 2’ படம் வரும் 28ஆம் தேதி உலகம் முழுவதும் திரையரங்குகளில் வெளியாக இருக்கும் நிலையில் இந்த படத்தின் புரமோஷன் பணிகள் விறுவிறுப்பாக நடைபெற்று வருகின்றன . சென்னை, கோவை, டெல்லி, கொச்சி ஆகிய பகுதிகளில் சமீபத்தில் புரமோஷன் நிகழ்ச்சி நடந்த நிலையில் இந்த புரமோஷன் நிகழ்ச்சிகளுக்கு மிகப்பெரிய ஆதரவு கிடைத்து வருகிறது.

இந்த நிலையில் ’பொன்னியின் செல்வன் 2’ புரமோஷன் நிகழ்ச்சி சமீபத்தில் கொச்சியில் நடந்தபோது நடிகர் கார்த்தி இடம் தொகுப்பாளர், ‘உங்கள் சகோதரர் ரோலக்ஸ் எங்கே? என்று கேட்டார். அப்போது கார்த்தி ’ரோலக்ஸ் என்று சொல்ல வேண்டாம், ரோலக்ஸ் சார் என்று சொல்லுங்கள்’ என்று கூறி, ‘தற்போது அவர் கொடைக்கானலில் இருக்கிறார்’ என்றும் கூறினார். இதனை அடுத்து கொடைக்கானலில் நடைபெற்று வரும் ‘கங்குவா’ படப்பிடிப்பில் சூர்யா இருக்கிறார் என்பது உறுதி செய்யப்பட்டுள்ளது. மேலும் த்ரிஷா குறித்து கார்த்தி கூறியபோது, ‘த்ரிஷாவை பொறுத்தவரை உங்களுக்கு ஜெஸ்ஸி, ஜானுவாக இருக்கலாம், ஆனால் என்னை பொறுத்தவரை அவர் குந்தவை தான், இனிமேல் உங்களுக்கும் அவர் குந்தவையாக இருப்பார்’ என்று கூறினார்.

இந்த நிலையில் ’பொன்னியின் செல்வன் 2’ படத்தின் அடுத்த புரமோஷன் நிகழ்ச்சி ஹைதராபாத்தில் வரும் 23ஆம் தேதி நடைபெற இருப்பதாகவும் இந்த நிகழ்ச்சியில் படக்குழுவினர் அனைவரும் கலந்து கொள்ள இருப்பதாகவும் தகவல்கள் வெளியாகி உள்ளன.